Палітвязня Міхаіла Жамчужнага прызналі асобай, схільнай да экстрэмізму
Міхаіл Жамчужны. Фота: svaboda.org
Пра гэта заснавальнік “Платформ інавэйшн” Міхаіл Жамчужны, які адбывае пакаранне ў папраўчай калоніі №14 ў Навасадах, напісаў у лісце да праваабаронцы Таццяны Рэвяка.
“Нечакана 17 чэрвеня мяне выклікалі ў рэжымны аддзел і начальнік Шэтко прапанаваў мне распісацца ў тым, што я абавязаны буду дадаткова двойчы ў дзень з’яўляцца на праверку, інакш будзе парушэнне рэжыму. Натуральна, я пацікавіўся: на якой падставе? Паколькі я за паўгады ў ПК-14 не меў аніякіх заўваг і парушэнняў. Ён адказаў, што на мяне склаў рапарт аператыўны супрацоўнік калоніі Крышталь у тым, што я з’яўляюся экстрэмістам, што мне выдадуць чырвоную нагрудную бірку і зноў некуды перакладуць спаць. З рапартам я азнаёмлены не быў і ніякіх камісій і судоў па такому сур’ёзнаму абвінавачванню не было. Тым больш фактаў маёй экстрэмісцкай дзейнасці ні тут, ні на волі, ні ў СІЗА-2 няма”, – піша ён.
Міхаіл Жамчужны таксама паведамляе ў лісце аб тым, што ў асабістай гутарцы з даверанымі супрацоўнікамі ПК-14 прагучала, што статус схільнага да экстрэмізму яму прысвоены нібыта ў сувязі з распаўсюдам сярод зняволеных забароненай літаратуры ў выглядзе 2 кніг Святланы Алексіевіч, якія яму даслалі ў калонію.
“Гэта не гумар, каб мне ніколі на самалётах болей не лётаць”, - паведамляе палітвязень.
Варта адзначыць, што ў красавіку бягучага года Міхаіл Жамчужны быў пераведзены на палепшаныя ўмовы ўтрымання, паколькі не мае парушэнняў рэжыму.
“Камічнасць сітуацыі, якую адзначылі ўсе зняволеныя ПК-14, заключаецца ў тым, што я знаходжуся на “палепшаных умовах утрымання” і ўжо пададзеныя звесткі на заахвочванне за прыкладныя паводзіны за 2 квартал у выглядзе дадатковай харчовай пасылкі”
Міхаіл Жамчужны выказаў таксама падзяку Таццяне Рэвяка за тое, што яна даслала яму квітанцыю аб аплаце дзяржпошліны.
“Я тут падаваў 3 заявы аб аплаце, на якія не было ніякай рэакцыі. У спецаддзеле я атрымаў тлумачэнне ў супрацоўніка, што наглядная абскарджванне ў гэтай калоніі дазволена толькі праз год пасля вынясення прысуду. Я разумею, што гэта парушэнне і Крымінальна-працэсуальнага кодэкса, і Канстытуцыі, але зрабіць нічога не магу. Без аплаты скаргу не прымуць да разгляду".
У ліпені 2015 года Міхаіл Жамчужны быў асуджаны Віцебскім абласным судом на 6 гадоў пазбаўлення волі ў калоніі строгага рэжыму. 23 кастрычніка судовая калегія па крымінальных справах Вярхоўнага суда разгледзела касацыйную скаргу і прызначыла Жамчужнаму больш строгае пакаранне – шэсць з паловай гадоў пазбаўлення волі. Яго прызналі вінаватым у наўмысным выдаванні звестак, што складаюць службовую таямніцу і ў незаконным набыцці сродкаў для сакрэтнага атрымання інфармацыі, што складае службовую таямніцу.
Беларускімі праваабаронцамі Міхаіл Жамчужны прызнаны палітычным зняволеным.
