Генеральная пракуратура патлумачыла праваабаронцу, чаму сайт spring96.org патрапіў у спіс абмежаванага доступу
Намеснік старшыні Праваабарончага цэнтру “Вясна” Валянцін Стэфановіч атрымаў адказ на свой зварот у Генеральную пракуратуру Беларусі, які тычыўся унясення сайта www.spring96.org ў спіс абмежаванага доступу для інтэрнэт-карыстальнікаў.
Раней Валянцін Стэфановіч звяртаўся ў Аператыўна-аналітычны цэнтр, які зацвярджаў пастанову аб абмежаванні доступу інтэрнэт-карыстальнікаў да асобных сайтаў, і ў РУП “БелДІЭ”, якое непасрэдна фарміруе спісы абмежаванага доступу. Але даведацца, хто стаў ініцыятарам унясення сайта spring96.org у гэты самы “чорны спіс”, у гэтах установах не атрымалася.
Міністэрства сувязі і інфарматызацыі на зварот Валянціна Стэфановіча таксама паведамляла, што: “Інтэрнэт-сайт spring96.org не зарэгістраваны ў нацыянальным сегменце сеткі Інтэрнэт. Мінсувязі не валодае інфармацыяй па пытаннях абмежавання доступу да сайтаў, незарэгістраваных у нацыянальным сегменце сеткі Інтэрнэт”.
Нарэшце ў адказе з Генеральнай пракуратуры Рэспублікі Беларусі, які быў падрыхтаваны 10 снежня (у Міжнародны дзень правоў чалавека) паведамляецца, што “Праваабарончая арганізацыя “Вясна” ў якасці грамадскага аб’яднання, палітычнай партыі або юрыдычнай асобы іншай арганізацыйна прававой формы ў Міністэрстве юстыцыі не зарэгістравана….
Дзеянні ад імя праваабарончай арганізацыі “Вясна”, якая не прайшла ў вызначаным парадку дзяржаўную рэгістрацыю, супярэчыць заканадаўству Рэспублікі Беларусь. Акрамя таго, за арганізацыю дзейнасці, або ўдзел у дзейнасці палітычнай партыі, іншага грамадскага аб’яднання, рэлігійнай арганізацыі ці фонда, якія не прайшлі ва ўстаноўленым парадку дзяржаўную рэгістрацыю артыкулам 193.1 Крымінальнага кодэкса Рэспублікі Беларусь прадугледжаная крымінальная адказнасць.
У сувязі з тым, што доўгі час на інтэрнэт-рэсурсе www.spring96.org размяшчалася інфармацыя, якая прапагандуе дзеянні, забароненыя заканадаўствам, Генеральнай пракуратурай у жніўні 2011 г. вынесена пастанова аб уключэнні ідэнтыфікатара гэтага інтэрнет-рэсурса ў спіс абмежаванага доступу, якая накіравана ў РУП “БелДІЭ” длявыканання. Адказ Генпракуратуры падпісала, як гэта ні дзіўна гучыць, начальнік аддзела па нагляду за захаваннем правоў і свабод грамадзян(!) М. Папова.
Патрэбна адзначыць, што Указ Прэзідэнта РБ №60 “Аб мерах па ўдасканаленню выкарыстання нацыянальнага сегмента сеткі Інтэрнет, быў падпісаны 1 лютага 2010 года, а ў чэрвені 2010 года з’явілася сумесная Пастанова Аператыўна-аналітычнага цэнтра пры Прэзідэнце Рэспублікі Беларусь і Міністэрства сувязі і інфарматызацыі Рэспублікі Беларусь, якая рэгламентуе парадак абмежавання доступу карыстальнікаў інтэрнет-паслуг да інфармацыі, забароненай да распаўсюду ў адпаведнасці з заканадаўчымі актамі.
Напрошваецца лагічная выснова: чаму амаль год сайт “Вясны” не цікавіў Генеральную пракуратуру, а пастанова аб унясенні сайта ў спіс абмежаванага доступу з’явілася толькі ў жніўні 2011 года? Верагодна таму, лічаць праваабаронцы, што менавіта ў гэты час быў арыштаваны кіраўнік Праваабарончага цэнтру “Вясна” Алесь Бяляцкі і гэтыя карныя дзеянні ўладаў, звязаныя самым непасрэдным чынам, мелі на мэце спыніць законную праваабарончую дзейнасць “Вясны”.
Нагадаю, што тады, 16 лютага 2011 г Генеральная пракуратура Рэспублікі Беларусь вынесла Алесю Бяляцкаму афіцыйнае папярэджанне за незаконную арганізацыю дзейнасці грамадскага аб'яднання, рэлігійнай арганізацыі або фонду альбо ўдзел у іх дзейнасці згодна з артыкулам 193-1 Крымінальнага кодэкса Рэспублікі Беларусь.
Праваабаронца Валянцін Стэфановіч мае намер праз суд аспрэчыць пастанову Генеральнай пракуратуры аб уключэнні сайта ПЦ “Вясна” ў спіс абмежаванага доступу, які накіраваны ў РУП “БелДІЭ” для выканання.
З гэтай нагоды Праваабарончы цэнтр “Вясна” рыхтуе адпаведную Заяву, якая неўзабаве будзе размешчаная на нашым сайце.
