Леаніда Дубаносава не хочуць браць на “Граніт” ні на якую пасаду
Леанід Дубаносаў.
Сябра Беларускага незалежнага прафсаюза Леанід Дубаносаў не можа дамагчыся аднаўлення на працы на прадпрыемстве “Граніт” і лічыць, што адбываецца гэта менавіта з-за яго прафсаюзнай дзейнасці.
На РУВП “Граніт” Дубаносаў адпрацаваў амаль 20 гадоў і гатовы працягнуць сваю дзейнасць, бо мае шэраг запатрабаваных на прадпрыемстве спецыяльнасцяў. “Калі ў судзе слухалася справа наконт майго аднаўлення на працы, юрыст “Граніта” пераконваў, што кантракт не быў працягнуты зусім не на падставе майго сяброўства ў незалежным прафсаюзе, - распавядае Леанід. – Тады я прышоў на прыём да генеральнага дырэктара Эдуарда Гаўрылковіча і нагадаў, што магу працаваць не толькі як экскаватаршчык. Аднак кіраўнік адміністрацыі “Граніта” катэгарычна адмовіў у тым, каб я зноў уладкаваўся на працу на гэтым прадпрыемстве і спасылаўся на тое, што ў мяне былі парушэнні, якія і з’явіліся падставай для звальнення. Але насамрэч мяне не звальнялі, а не працягнулі кантракт”.
Леанід Дубаносаў падкрэслівае, што на “Граніце” зараз адчуваецца недахоп рабочых кадраў, таму адмову ў працаўладкаванні ён адназначна расцэньвае, як дыскрымінацыю ў сувязі з удзелам у незалежным прафсаюзным руху.
