Бабруйск: Бузінаеву вярнулі асобнікі партыйнай газеты “Голас розуму”

Віктар Бузінаеў, старшыня бабруйскай суполкі АГП, расказаў, што міліцыянты вярнулі яму ўсе асобнікі партыйнай газеты “Голас розуму”. Нагадаем, 14 жніўня актывіст разам з Анатолем Лябедзькам раздаваў яе каля прахадной ААТ “Белшына”, але іх затрымалі супрацоўнікі міліцыі. 

- Пасля затрымання мяне выклікалі нібыта на складанне пратакола, маёр Рудзько патрабаваў, каб я прыйшоў да яго ў наступны раз з раздрукаваным партыйным Статутам, з пячаткай. А тут раптам выклікаюць, я прыходжу, і мне вяртаюць усе канфіскаваныя асобнікі “Голаса розуму”, - кажа Віктар Бузінаеў. – Таксама мне паведамілі, што адміністратыўная справа ў дачыненні да мяне спыненая.

Актывіст кажа, што маёр Сяргей Рудзько не здолеў яму патлумачыць, чаму адміністратыўную справу спынілі.

- Ён мітусіўся і казаў, што ўсё роўна канфіскуе ў мяне газеты, калі я надумаю іх раздаваць. Я адказаў, што буду распаўсюджваць “Голас розуму”, адразу пасля выхаду з аддзялення міліцыі, так і зрабіў. У афіцыйнай паперы, якая прыйшла мне па пошце, гаворыцца, што падчас праверкі парушэнняў не знойдзена, таму міліцыянты мусяць спыніць справу і вярнуць бюлютэні.

Віктар Бузінаеў адзначае, што падчас затрымання маёр Рудзько налічыў у актывістаў 305 асобнікаў партыйнай газеты. Але вырашальным фактарам стала тое, што ў іх агульную колькасць уваходзілі як старыя, так і новыя нумары.

Анатоль Лябедзька таксама атрымаў пастанову аб спыненні справы аб адміністратыўным парушэнні.