“Яшчэ прыйдзе вясна!”
Праваабарончы цэнтр "Вясна" выпусціў вялікі наклад паштовак у падтрымку палітвязняў. Па словах сябры рады гэтай арганізацыі Таццяны Равякі, надрукавана тры варыянты паштовак, якія кожны жадаючы можа даслаць палітычнаму зняволенаму.
У Беларусі, па дадзеных "Вясны", па палітычных матывах за кратамі знаходзіцца 11 чалавек.
- На паштоўках словы, звернутыя да вязняў: “Дзякуй табе, сябра! Ганарымся, не забываем, любім. Нас многа”. Таксама ёсць паштоўка з выявай дзяўчыны, якая піша ліст: “Я думаю пра цябе. Тое, што ты ёсць, важна для мяне”. Ну, і зразумела, паколькі мы “вясноўцы”, асобны мэсідж - да Алеся Бяляцкага: “Твой лёс важны для мяне”. І на адваротным баку: “Яшчэ прыйдзе вясна!”
Па словах Таццяны Равякі, гэтыя кароткія пасланні, мэсіджы да палітзянволеных выбраны з прапаноў у фэйсбуку пасля таго, як праваабаронцы звярнуліся да грамадзян з ідэяй абмеркаваць выгляд паштовак.
“Рассылка паштовак стане працягам кампаніі салідарнасці з палітзняволенымі, якую Праваабарончы цэнтр "Вясна" праводзіць ужо даўно”, - кажа Таццяна Равяка.
