Салігорск: Праваабарончую літаратуру перадалі ў раённую бібліятэку
Прадстаўнікі РПГА “Беларускі Хельсінскі камітэт” перадалі ў Салігорскую цэнтральную раённую бібліятэку праваабарончую літаратуру. Сярод перададзеных выданняў варта адзначыць выдадзены Беларускім домам правоў чалавека ў Вільні зборнік аўтарскіх матэрыялаў і дакументаў “Індывід v. дзяржава”, прысвечаны практыцы зваротаў у дамоўныя органы ААН і датычны Рэспублікі Беларусь. У зборніку можна знайсці матэрыялы аб змесце і практычных аспектах канцэпцый міжнароднага права правоў чалавека, непасрэдна звязаных з інстытуам індывідуальных скаргаў. Таксама ў бібліятэку была перададзена брашура з Рашэннем Камітэта па правах чалавека ААН па справе Уладзіслава Кавалёва, пакаранага смерцю ў сувязі з тэрактам ў мінскім метро.
Варта адзначыць, што ў Салігорскай цэнтральнай раённай бібліятэцы дзейнічае адмысловы Цэнтр прававой інфармацыі. Сярод іншага ў Цэнтры маецца надзвычай карыснае чатырохтомнае тэматычнае выданне “Правы чалавека: міжнародна-прававыя дакументы і практыках іх прымянення”, таксама перададзенае у бібліятэчны фонд некалькі год назад мясцовым прадстаўніцтвам Беларускага Хельсінскага камітэту.
