Ад Рушаніі Васьковіч зноў патрабуюць заплаціць за будынак КДБ

Маці Яўгена Васьковіча атрымала з Магілёўскай турмы № 4 дзіўны ліст, у якім яе просяць зноў аплаціць шкоду, нанесеную яе сынам будынку КДБ. Нагадаем, што сума выплаты па рашэнні суда складала 253 тысячы рублёў.

-Хутчэй за ўсё, у турму проста не дайшлі нейкія дадзеныя, - мяркуе Рушанія Васьковіч. – Бо гэтыя грошы мы даўно выплацілі. Я ўжо даслала туды неабходныя дакументы, спадзяюся, што на наступным тыдні прыйдзе адказ.

Таксама маці Яўгена Васьковіча адзначае, што існуюць праблемы з ліставаннем, але прычыны не ведае.

-Неяк тры месяцы мне лісты ад Жэні не прыходзілі, ведаю, што да некаторых яго сяброў і калег зусім не даходзяць, - распавядае Рушанія Васьковіч. – Нейкія пасылкі да яго вяртаюць назад. Летам паспрабую дабіцца, каб далі спатканне з сынам, але на гэта мала спадзяванняў. Хутчэй за ўсё, убачу яго толькі ў наступным годзе.