БХК просіць пракуратуру правесці праверку ўмоў утрымання Каваленкі у турэмным шпіталі

Алена Каваленка паведаміла, што ў цяперашні час яе муж знаходзіцца ў крытычным стане, пры гэтым яму не аказваецца належная медыцынская дапамога.

У цяперашні час Сяргей Каваленка знаходзіцца ў псіхіятрычным аддзяленні турэмнага шпіталя папраўчай калоніі № 3 Віцебскай вобласці ў сувязі з доўгай галадоўкай.

Юрысты Беларускага Хельсінкскага Камітэта накіравалі пракурору Віцебскага раёна зварот з просьбай праверыць законнасць і абгрунтаванасць змяшчэння Каваленкі ў псіхіятрычнае аддзяленне турэмнай бальніцы, а таксама адпаведнасць умоў у дадзенай папраўчай установе (наяўнасць адпаведных медыкаментаў, медыцынскага абсталявання і персаналу) яго стану.

У сувязі з тым, што з-за працягласці галадоўкі існуе рэальная пагроза жыццю Сяргея Каваленкі, праваабаронцы просяць правесці праверку ў самыя кароткія тэрміны.