Хто не ведае закону: аблвыканкам ці пракуратура? (дакументы)
Віцебскія актывісты паскардзіліся ў аблвыканкам і ў пракуратуру на тое, што атрымалі пісьмовы адказ на забарону пікету 19 снежня 2011 года са спазненнем на некалькі дзён. І атрымалі лісты цалкам супроцьлеглага зместу: з абласной пракуратуры адказалі, што парушэння не было, а з аблвыканкаму – што пакараюць вінаватых.
"Справа, канешне, даўняя. Але для нас прынцыповая, бо ў мінулым годзе нам забаранілі не толькі гэты пікет на знак салідарнасці з палітвязнямі, але ўвогуле не дазволілі правесці ніводнай акцыі. Дык мала таго: улады не толькі парушаюць нашы правы на свабоднае выказванне думак і меркаванняў, дык яшчэ й самі парушаюць заканадаўства – не лічаць патрэбным адказваць нам своечасова", -- распавядае адзін з заяўнікаў апошніх забароненых пікетаў Аляксей Гаўруцікаў.
Атрымаўшы са спазненнем адказ з гарвыканкаму наконт пікету 19 снежня, актывісты звярнуліся са скаргай у аблвыканкам і абласную пракуратуру. 6 сакавіка былі атрыманыя адказы з абедзьвюх інстанцый, прычым адзін выразна супярэчыць другому.
"Парушэнняў дзейнага заканадаўства наконт разгляду вашага звароту ў гарвыканкам і напісання пісьмовага адказу не выяўлена", -- напісана ў лісце з пракуратуры.
"Падчас вывучэння пытання выяўлена, што Віцебскім гарвыканкамам парушана патрабаванне артыкула 6 Закона Рэспублікі Беларусь "Аб масавых мерапрыемствах у Рэспубліцы Беларусь", -- адказалі з аблвыканкаму. Там пагдзіліся, што адказ заяўнікам далі са спазненнем, таму "старшыні гарвыканкаму накіраваны ліст з указаннем прыцягнуць вінаватых да адказнасці".
Актывісты лічаць, што праблемы з пратэрміноўкай адказу і з забаронамі на замоўленыя акцыі маюць адны карані: улады не хочуць дапусціць распаўсюду непажаданай для іх інфармацыі, і ў гэтым памкненні нават гатовыя парушаць заканадаўчыя нормы.
