Яшчэ адна вестка ад Алеся Бяляцкага – з Валадаркі
СІЗА на Валадарцы. Фота Юлі Дарашкевіч
Сёння сябры “Вясны” атрымалі яшчэ адну паштоўку ад Алеся Бяляцкага. На паштоўцы рукою праваабаронцы пазначана: “22.02.2012, Валадарка”.
Алесь піша, што ён “ужо тыдзень, як “на этапах”… у пятніцу ў абед зьявіўся ў цэнтры Менску, у звыклай для сябе атмасферы… Тыдзень прайшоў хутка, мяркую, заўтра [23 лютага - рэд.] паеду, а калі заўтра не адправяць, значыць яшчэ пару дзён тут пабуду”.
Зыходзячы з гэтых словаў Алеся, магчыма, што ён гэтыя выходныя правядзе яшчэ ў менскім СІЗА.
Нагадаем, што 17 лютага ПЦ “Вясна” стала вядома, што старшыню арганізацыі Алеся Бяляцкага этапавалі з Жодзінскай турмы №8 ў Бабруйскую папраўчую калонію №2. Мяркуючы з атрыманых ад Алеся паштовак, гэты час на этапе перасылкі ён утрымліваецца ў менскім СІЗА на Валадарскага.
