Сяргей Каваленка галадае ў карцэры СІЗА

Як стала вядома маці зняволенага віцебскага актывіста, Сяргея Каваленку, які 24-я суткі трымае галадоўку пратэсту, тыдзень таму змясцілі ў карцэр. Прадстаўнік адміністрацыі следчага ізалятара адмовіўся патлумачыць Лідзіі Каваленка, на якой падставе чына "ізалявалі".

"Я панесла перадачу – рэчы для Сяргея. І тут дзяжурны мне гаворыць, што Сяргей у карцэры. Калі? За што? Толькі ўчора адвакат сустракаўся з Сяргеем і казаў, што той проста ў камеры-адзіночцы. Значыць, і адвакату не паведамілі праўду?" – абураецца маці зняволенага.

Прычыну пераводу ў карцэр прадстаўнік адміністрацыі СІЗА таксама не паведаміў Лідзіі Каваленка:

"Ён сказаў, што прычыну не назаве, каб яна не трапіла ў мае "інтэрвью". Напэўна, у СІЗА ведаюць, што наша сям'я пра ўсе навіны распавядае журналістам… Начальнік заявіў, што было нейкае парушэнне з боку Сяргея, але якое – скажа толькі свайму начальству. Я баюся, што парушэнне – гэта каб ускладніць становішча майго сына, супраць якога і так узбуджана крымінальная справа за парушэнне рэжыму падчас "хатняй хіміі", прысуджанай за бел-чырвона-белы сьцяг, які ён вывесіў на навагодняй елцы”.

Лідзія Каваленка занесла ў СІЗА заяву, што яна патрабуе вызваліць сына або перавесці яго ў медычную ўстанову – уся сям'я занепакоена станам здароўя Сяргея, які ўжо 24-я суткі галадуе на знак пратэсту супраць  крымінальнага абвінавачання  ў парушэнні рэжыму. Паводле артыкула 415 яму пагражае да 3-х гадоў турэмнага зняволення.