Апазіцыйнага актывіста выключаюць з каледжа
Пакуль маладэчанец Павел Сяргей адсіджваў свае суткі за 19 снежня, да яго дадому прыйшоў ліст аб выключэнні хлопца з навучальнай установы. Афіцыйная прычына – “за пропускі”. За апошнія месяцы гэта ўжо другая спроба адміністрацыі пазбавіцца непатрэбнага навучэнца.
Павел вучыцца ў Маладэчанскім дзяржаўным палітэхнічным каледжы. Першы раз на мяжы выключэння ён знаходзіўся пасля арышту за закідванне яйкамі помніка Леніна 7 лістапада. Тады пра гэта напісалі многія незалежныя СМІ, што, на думку Паўла, паспрыяла таму, што яго пакінулі ў каледжы.
Цяпер ізноў спрабуюць выключыць за прагулы. Пры гэтым у лісце пазначана, што Павел адсутнічаў 16 снежня. Хлопец сцвярджае, што ў гэты дзень на занятках ён быў. Да таго ж у наступныя дні, да моманту арышту, ён таксама знаходзіўся ў каледжы, і ніхто ніякіх прэтэнзіяў не агучваў.
У бліжэйшыя дні Павел збіраецца высветліць сітуацыю і пракансультавацца з праваабаронцамі аб магчымасці змагання супраць рашэння адміністрацыі навучальнай ўстановы.
