Анжаліка Камбалава напісала скаргу начальніку глыбокскай калоніі

Старшыня баранавіцкай гарадской арганізацыі АГП Анжаліка Камбалава напісала скаргу начальніку калоніі № 13 г. Глыбокае, бо абураная тым, што там не прынялі яе пасылку для палітвязня Зміцера Дашкевіча.

У скарзе актывістка запыталася ў начальніка калоніі, «дзе, у якім законе, артыкуле, правілах распарадку гэта напісана, і хто, дзеля чаго і ў якім годзе іх прымаў, ці не пераблытаў чыноўнік сучасны закон з сярэднявечным статутам».

Спн. Камбалава ўпэўнена ў тым, што такія драконаўскія турэмныя законы не прадухіляюць, а памнажаюць нянавісць людзей і яны выходзяць на волю яшчэ больш злымі, больш жорсткімі, больш суровымі, перакананымі ў варожасці свету. Супраць каго павернецца гэтая варожасць? Ці не зашмат нянавісці вакол нас? Ці ёсьць неабходнасць яе памнажаць? Актывістка патрабуе адказу на свае пытанні. «Нават калі і існуе такая дзікунская забарона, то Вы першы павінны змагацца супраць гэтага», - піша яна начальніку калоніі.