Праваабаронца Алесь Бяляцкі абскардзіць папярэджаньне Генпракуратуры ў судзе (дапоўнена)
Старшыня праваабарончага цэнтру “Вясна” Алесь Бяляцкі
Папярэджаньне Генеральнай пракуратуры старшыні Праваабарончага цэнтру “Вясна”, віцэ-прэзідэнту Міжнароднай федэрацыі правоў чалавека (FIDH) Алесю Бяляцкаму будзе абскарджана у судзе Цэнтральнага раёна Менска 3 чэрвеня. Пачатак у 15-30. Суддзя Алена Сямак.
Генеральная пракуратура палічыла, што дзеяньні А. Бяляцкага ад імя праваабарончай арганізацыі “Вясна”, якая не прайшла ва ўстаноўленым парадку дзяржаўнай рэгістрацыі, супярэчыць заканадаўству Рэспублікі Беларусь і 16 лютага 2011 г. вынесла яму афіцыйнае папярэджаньне аб недапушчальнасьці парушэньня закона за подпісам намесьніка Генеральнага пракурора Рэспублікі Беларусь М.І. Кукліса.
Праваабаронца афіцыйна папярэджаны, што ў выпадку далейшай дзейнасьці будзе разгледжана пытаньне аб прыцягненьні яго да крымінальнай адказнасьці.
Рада Праваабарончага цэнтру “Вясна” выступіла з афіцыйнай заявай, у якой выказала рашучы пратэст з нагоды дзеяньняў Генеральнай пракуратуры і расцаніла гэта як спробу запалохваньня актывістаў арганізацыі і ўсяго праваабарончага руху Беларусі.
Аператыўна аб вынесеным папярэджаньні была праінфармаваная спецдакладчык ААН па пытаньні аб становішчы праваабаронцаў спадарыня Маргарэт Сэкагія, а шэраг міжнародных праваабарончых арганізацый запатрабавалі ад Генеральнай пракуратуры Беларусі адмены гэтага ганебнага рашэньня.
