Суды за Плошчу: заўтра прысуд Вінаградаву, Кіркевічу, Дразду, Пратасеню, Хамічэнку
Фота Радыё Свабода
Паседжанне пачалося з допыту новых сведак, сярод іх у спісе і экс-кандыдат у прэзідэнты Віталь Рымашэўскі.
Працэс праходзіць пад старшынствам суддзі Алы Булаш, пры ўдзеле пракурора Бароўскага і адвакатаў падсудных.
Віталь Рымашэўскі не змог з'явіцца ў Кастрычніцкі суд, бо дае паказанні на працэсе па справе Андрэя Саннікава і іншых удзельнікаў Плошчы.
Адбыўся допыт іншых сведак з боку абароны.
Сведкам з боку Алеся Кіркевіча выступіў настаўнік ліцэю з Горадні Госцеў, які даў характарыстыку Алесю падсуднаму, што вучыўся ў гістарычным класе ліцэю. Алесь займаўся краязнаўствам і з’яўляецца стваральнікам краязнаўчага музею, цікавіцца архіялогіяй, музейнай справай, адказваў за фонды музея. Сведка ахарактарызаваў Кіркевіча як вельмі адказнага, актыўнага, высокамаральнага , сумленнага і цікаўнага чалавека. Як сапраўднага хрысціяніна, які трымаецца хрысціянскіх каштоўнасцяў, ахарактарызаваў Кіркевіча другі сведка - пастар пратэстанцкай царквы евангельскіх хрысціян-баптыстаў Павел Руды.
Адбыўся прагляд відэаматэрыялаў па справе.
Дзмітрый Дрозд прызнаў, што нанёс некалькі ўдараў па драўляных шчытах.
Андрэй Пратасеня нанёс некалькі ўдараў і вырваў шчыт з вакна Дома Ураду.
Да вечара ў судзе матэрыялы справы былі разгледжаныя, выступілі пракурор і адвакаты. Дзяржаўны абвінаваўца спадар Бароўскі запатрабаваў пакараць усіх падсудных пазбаўленнем волі: А.Кіркевіча і П.Вінаградава - 4 гадамі, Дзм. Дразда -- тэрмінам у 3,5 гады, У. Хамічэнку і А.Пратасеню -- 3 гадамі зняволення.
