Слухайце штотыднёвую праваабарончую праграму “Людзьмі звацца!” на хвалях Радыё Рацыі

Кожны аўторак у эфіры незалежнай радыёстанцыі “Радыё Рацыя” - праграма “Людзьмі звацца!”, якая асвятляе падзеі, датычныя правоў чалавека на Беларусі.

Праграма складаецца з наступных рубрык: “Хроніка пераследу”, "Падзея тыдня", “Асоба. Дзяржава. Грамадства” і “Рэха Плошчы”.

Час выхаду праграмы ў эфір – 15-05. Таксама ў гэты час яе можна слухаць праз інтэрнэт на сайце www.racyja.com.

Сёння, 15 сакавіка, у чарговым выпуску праграмы “Людзьмі звацца!” для слухачоў падрыхтавана “Хроніка пераследу” - агляд парушэнняў правоў чалавека, у якім прадстаўлены найбольш гучныя факты пераследу за мінулы тыдзень.  

У рубрыцы “Падзея тыдня” - каментары праваабаронцаў наконт судовага працэсу па скарзе Беларускага Хельсінкскага Камітэта на папярэджанне Міністэрства юстыцыі, што праходзіў 9-11 сакавіка ў Вярхоўным судзе.

Сённяшні госць рубрыкі “Асоба. Дзяржава. Грамадства” – Павел Сапелка, аддзін з пяці беларускіх адвакатаў, якіх на працягу апошніх месяцаў Мінюст пазбавіў права на прафесійную дзейнасць. Рашэннем прэзідыуму Менскай гарадской калегіі адвакатаў 4 сакавіка ён быў выключаны з шэрагаў калегіі і тым самым пазбаўлены магчымасці працягваць працу адваката. Праваабаронцы і юрысты назвалі такое рашэнне незаконным і трывожным у сэнсе абмежавання незалежнасці беларускай адвакатуры.  
Павел Сапелка ў інтэрв’ю дзеліцца сваім меркаваннем пра актуальны стан гэтага важнага інстытута абароны правоў грамадзян і агульную сітуацыю з адвакатурай у Беларусі.  

Новая рубрыка “Рэха Плошчы” распачатая у праграме для асвятлення судовых працэсаў па крымінальнай справе аб масавых беспарадках 19 снежня.  

Сэза́рыя Э́вара (Cesária Évora) – пажылая цемнаскурая жанчына спецыфічнай знешнасці з рэдкім, прыгожым голасам. У песенных  яна распавядае пра цяжкае жыццё насельніцтва сваёй краіны – Астравоў Зялёнага Мысу. На знакамітыя канцэртныя пляцоўкі свету Эвара выходзіць нязменна басанож – гэта сімвалічная даніна беднасці, у якой і сёння працягваюць жыць яе землякі. Галоўнае ў спевах Сэзарыі – “саўдаджы”, што перакладаецца з крэольскага дыялекту, на якім спявае афрыканская дзіва, як “пачуццё светлай тугі па радзіме”.
Калі б ні голас Сэза́рыі Э́вара, то наўрад ці б свет даведаўся пра маленькую астраўную краіну. Таму яна – босая міліянерка, якая не пакідае сваёй беднай радзімы – не проста спявачка, а грамадска-палітычная фігура. Дзесяткі мільёнаў даляраў Эвара ахвяруе на дабрачыннасць – на дзіцячыя сацыяльныя праграмы. За кошт яе ганарараў аплочваецца амаль уся сістэма пачатковай адукацыі Астравоў Зялёнага Мысу.  
На мінулым тыдні беларускія прыхільнікі ўнікальнай спявачкі маглі пацешыць душу – яна давала канцэрт у Менску. Сёння кампазіцыі ў яе выкананні ствараюць музычны фон праграмы "Людзьмі звацца!".

Радыё Рацыя – першае незалежнае інфармацыйна-забаўляльнае FM-радыё ў Польшчы на беларускай мове. Галоўнай мэтай Беларускага Радыё Рацыя з’яўляецца стварэнне грамадзянам Беларусі доступу да незалежнай інфармацыі аб падзеях і развіцці сітуацыі ў Беларусі, Польшчы, Еўропе ды свеце.