"Гэта з-за вас назіральнікі АБСЕ не прызналі нашы выбары"
Валянціна Свяцкая
Усе скаргі на парушэнні падчас гэтай выбарчай кампаніі Мінская гарадская выбарчая камісія палічыла беспадстаўнымі. Але пры гэтым два сябры гэтай камісіі - Галіна Сямдзянава і Аляксей Сігаеў - не пагадзіліся з меркаваннем калегаў і выказалі асабістае меркаванне. Што, на думку прысутнай на паседжанні гарадской камісіі назіральніцы Валянціны Свяцкай, з'явілася непрыемным сюрпрызам, як для асобных сябраў камісіі, так і для некаторых назіральнікаў:
"Назіральнік ад КПБ Павел Кікель не вытрымаў і заявіў: "Гэта з-за вас назіральнікі АБСЕ не прызналі нашы выбары". Я адразу ўзгадала трэнінг-семінар, які праводзіўся са старшынямі ўчастковых камісій у Маскоўскім раёне сталіцы і на якім гаварылася аб дзеяннях "правільных" назіральнікаў у выпадку, калі "няправільныя" назіральнікі стануць агучваць факты парушэнняў выбарчага заканадаўства. У такім выпадку рэкамендавалася "нашым" назіральнікам неадкладна падымацца са сваіх месцаў і пачынаць запэўніваць усіх прысутных, што "ў нас усё нармальна" ...
Дарэчы, на думку В. Свяцкай, многія сябры Мінскай гарадской выбарчай камісіі выглядалі даволі сумнымі і відавочна не былі падобныя на пераможцаў.
"Праваабаронцы за свабодныя выбары"
