“Калінкавіцкія навіны” апраўдваюцца

“Праваабаронцы за свабодныя выбары” паведамлялі, як калінкавіцкая раённая газета асвятляла ход збору подпісаў у райцэнтры. У прыватнасці, аўтар артыкулу зазначаў, што збор подпісаў за Аляксандра Лукашэнку ідзе актыўна, а Віталь Рымашэўскі, які наведаў райцэнтр - невядомы нікому ў Калінкавічах прэтэндэнт на прэзідэнцкую пасаду.

Артыкул пра піяр раённай газетай Лукашэнкі і “чорны піяр” Рымашэўскага надрукаваў і незалежны гомельскі сайт odsgomel.org. І тады Аляксандр Века, аўтар артыкула ў газеце “Калінкавіцкія навіны”, відаць, палічыў патрэбным “запярэчыць аўтарам інфармацыі на сайце odsgomel.org у тым, што раённая газета “адкрыта падтрымлівае збор подпісаў толькі за аднаго прэтэндэнта - Аляксандра Лукашэнку”. “У згаданым вышэй артыкуле я называў імя Віталя Рымашэўскага, які прапаноўваўся кандыдатам у Прэзідэнты”, - апраўдваецца аўтар артыкулу. 

Называць называў, але як? “Невядомы мне, прынамсі, я больш чым упэўнены, што гэты малады чалавек дакладна таксама невядомы і большасці калінкавічан”, - так ахарактэрызаваў ён Рымашэўскага, а цяпер гэтым жа прозвішчам вырашыў апраўдацца, маўляў, я і пра яго пісаў.

І каб ужо канчаткова пераканаць чытачоў у сваёй аб'ектыўнасці, А.Века ўзгадаў пра тое, што, аказваецца, у райцэнтры збіралі подпісы і за Уладзіміра Някляева, нават даў слова сябру ініцыятыўнай групы прэтэндэнта на прэзідэнцкі пост.

Дарэчы, звычайна раённыя газеты Гомельскай вобласці пры асвятленні выбарчага працэсу ці падаюць інфармацыю БЕЛТА, ці пішуць што-кольвек пра Лукашэнку, як гэта стала робіць  «Голас Веткаўшчыны». Аднак,  У. Някляева ўзгадалі не толькі «Калінкавіцкія навіны», але і петрыкаўская раённая газета. У гэтай раёнцы таксама высоўваецца “невядомасць” патэнцыйнага кандыдата: “Відаць па рэакцыі петрыкаўчан, імя Уладзіміра Някляева мала ім пра што гаворыць. Вершамі нямногія цікавяцца, часопіс (маецца на ўвазе «Крыніца») цяпер не выходзіць”.

“Праваабаронцы за свабодныя выбары”