Другі дзень суда над Міхасём Башурам
Працягваецца суд над Міхасём Башурам. У першы дзень паседжання суддзя Кірыл Полулех не задаволіў хадайніцтва аб змене ўтрымання Башуры, грамадскі актывіст працягвае ўтрымлівацца пад вартай з 6-га жніўня.
Што чакаецца на другім дні паседжання кажа адвакат Тамара Сідарэнка.
- Будуць дапытаны сведкі. Будуць агучаны матэрыялы другога тому. Разгледжаны хадайніцтвы абароны і абвінавачання. І можна будзе ставіць пытанне аб судовым абмеркаванні, гэта значыць, выступленні пракурора і адваката з ацэнкай: вінаваты, ці невінаваты Башура. І затым суд можа ўжо выносіць вырок. Можа справіцца за сёння і вынесці, але гэта ўжо як атрымаецца.
Мінскага каардынатара кампаніі “Гавары праўду” Міхася Башуру вінавацяць у падробцы дакументаў. Калі суд прызнае яго віну, актывісту можа пагражаць да трох год зняволення. Але яго адвакат Тамара Сідарэнка пэўная, што суд абмяжуецца штрафам, альбо наогул вынесе апраўдальны прысуд.
