З Юрыя Лявонава знялі ўсе абвінавачанні
Фота Юліі Дарашкевіч
З былога палітвязьня, ваўкавыскага прадпрымальніка Юрыя Лявонава зьнялі ўсе абвінавачаньні і спынілі супроць яго крымінальны перасьлед.
Пастанову аб прыпыненьні справы адносна Юрыя Лявонава аб падпале дома міліцыянта падпісаў сьледчы з Галоўнай управы барацьбы з арганізаванай злачыннасьцю Міністэрства ўнутраных спраў Віктар Клачко. Сёньня гэтую пастанову далі на рукі Юрыю Лявонаву.
Таксама ў міліцыі Лявонаву паведамілі, што супроць яго заводзілася справа ў сувязі з тым, што ён нібыта ведаў пра падрыхтоўку нейкага злачынства, але не паведаміў. Аднак з-за даўнасьці часу — бо ад тых падзей мінула болей за 2 гады — гэтую справу таксама закрылі.
Што да абвінавачаньня ў падпале дома міліцыянта ў Ваўкавыску, як вядома, яны ня зьнятыя з былога начальніка Лявонава ў фірме «Ніка-транс» Мікалая Аўтуховіча і былога вайскоўца Ўладзімера Асіпенкі. Вось як Юрый Лявонаў пракамэнтаваў пэрспэктывы далейшага расьсьледаваньня гэтай справы адносна Аўтуховіча і Асіпенкі:
«Для іх насамрэч гэта можа быць таксама добрым знакам. Паколькі
недаказанасьць удзелу ў злачынстве аднаго зь фігурантаў справы дае шанцы і астатнім на тое, што іх удзел таксама ня будзе даказаны. Але, як мне сёньня падаецца, справу ў суд усё ж перададуць.
Усё ідзе да таго. Таму зараз вельмі важна, каб суд быў адкрытым. І я зраблю дзеля гэтага ўсё магчымае. Усё, што ад мяне залежыць, буду рабіць, каб працэс быў адкрытым. Што да мяне, то мой статус зьмяніўся. Ад 18 гадзіны вечара я цалкам вольны чалавек».
Юрый Лявонаў ня выключыў, што яму прыйдзецца быць на судзе над Аўтуховічам і Асіпенкам сьведкам. Паводле Юрыя Лявонава, справа можа патрапіць у суд у канцы кастрычніка.
