viasna on patreon

Алесь Стральцоў не можа дамагчыся амністыі

2009 2009-08-15T20:05:00+0300 1970-01-01T03:00:00+0300 be https://spring96.org/files/images/sources/stralcou_ales.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Менскі гарадскі суд не задаволіў скаргу фігуранта “справы 14-ці” Алеся Стральцова на пастанову суду Цэнтральнага раёну ад 15 чэрвеня 2009 году. Дадзеная судовая пастанова змякчае пакаранне, ад якога малады чалавек ужо павінен быў быць вызвалены ў адпаведнасці з законам “Аб амністыі”.

Пра рашэнне гарадскога суду Алесю Стральцову паведамілі ў афіцыйным лісце за подпісам Старшыні В.Г. Пуціла.

Менскі гарадскі суд прызнаў пастанову суду Цэнтральнага раёну “законнай і абгрунтаванай” і вырашыў, што “падставаў для задавальнення скаргі і прынясення пратэсту з мэтай адмены пастановы няма”.

“Згодна з артыкулам 21 Закону Рэспублікі Беларусь ад 5 траўня 2009 году “Аб амністыі ў сувязі з 65-годдзем вызвалення Беларусі ад нямецка-фашысцкіх захопнікаў” пытанні прымянення амністыі ў дачыненні да асуджаных да пакарання ў выглядзе абмежавання волі без накіравання ў папраўчую ўстанову адкрытага тыпу, прысуды якім уступілі ў законную сілу, знаходзяцца ў кампетэнцыі органаў унутраных справаў”, - гаворыцца ў паведамленні гарадскога суду.

Беларускія праваабаронцы увесь час патрабуюць адназначнай амністыі ўсіх фігурантаў “працэсу 14-ці” і падкрэсліваюць, што на сёння гэта пытанне фактычна ніяк не вырашаецца. У траўні гэтага году Міжнародная праваабарончая арганізацыя Amnesty International прызнала 11 ўдзельнікаў “працэсу 14-ці” (тых, якія на сёння адбываюць пакаранне ў выглядзе абмежавання волі) вязнямі сумлення. Міжнародная супольнасць неаднаразова заклікала беларускія ўлады спыніць гэтыя крымінальныя справы і амніставаць усіх гэтых людзей.

 

 

Апошнія навіны

Партнёрства

Сяброўства