Берасцейская міліцыя не ведае, што рабіць з затрыманымі актывістамі РГА "Перспектыва"

Старшыня арганізацыі Анатоль Шумчанка, яго намеснікі Віктар Чайкоўскі і Вольга Круміна былі затрыманы 5 мая прыкладна ў 10.40 супрацоўнікамі міліцыі на бульвары Касманаўтаў, калі выходзілі з машыны.

Актывісты "Перспектывы" прыехалі ў Берасце для таго, каб уручыць дэпутатам абласнога савета адозву ўладальнікаў кіёскаў з патрабаваннем адмяніць рашэнне аблвыканкама аб забароне рэалізацыі піва і слабаалкагольных напояў у дробнарознічнай сетцы.

Як паведаміў БелаПАН Шумчанка, супрацоўнікі міліцыі заявілі, што ён падобны на чалавека, які аб'яўлены ў вышук. Затрыманых даставілі ў АУС Маскоўскага раёна Берасця, праверылі дакументы і ўзялі тлумачэнні наконт іх знаходжання ў абласным цэнтры.

"Складаецца ўражанне, што ў міліцыі не ведаюць, што з намі цяпер рабіць, — сказаў Шумчанка. — Нас ужо збіраліся адпускаць, але ўбачылі групу рэпарцёраў каля аддзела міліцыі і прапанавалі непрыкметна з'ехаць з горада на сваёй машыне. Я адмовіўся, бо гэта выглядала б як уцёкі".

Цяпер, паводле слоў лідэра "Перспектыва", супрацоўнікі РАУС кудысьці тэлефануюць. "Мабыць, кансультуюцца наконт таго, што з намі рабіць", — выказаў здагадку ён.

Група індывідуальных прадпрымальнікаў Берасця, якая марна чакала кіраўнікоў "Перспектывы", некалькі гадзін таму перадала адозву ў аблвыканкам з заклікам адмяніць рашэнне аб забароне рэалізацыі піва і слабаалкагольных напояў у дробнарознічнай сетцы, паведамляе БелаПАН.