Беларускія журналісты – «рупліўцы беларускай мовы»
Шэраг журналістаў недзяржаўных СМІ атрымалі дыпломы «Рупліўцам беларускай мовы» пад час урачыстага сходу, прысвечанага Міжнароднаму Дню роднай мовы, што адбыўся 21 лютага ў сталічным Палацы мастацтваў.
Сярод уладальнікаў дыпломаў, якія заснавала ГА «Таварыства беларускай мовы імя Францішка Скарыны», — карэспандэнт газеты «Народная воля» Святлана Кліменценка, шэф-рэдактар тыднёвіка «Новы час» Аляксей Кароль, галоўны рэдактар газеты «Наша слова» Станіслаў Суднік, карэспандэнт інфармацыйнага агенцтва «БелаПАН» Марат Гаравы.
«У Беларусі, дзякуй Богу, нягледзячы на той стан, да якога даведзена наша мова, — на ўціск, на абразы, на неразуменне, — вельмі многа сапраўдных цудоўных людзей, якія разумеюць: згубіш мову — згубіш самога сябе і згубіш сваю Бацькаўшчыну», — падкрэсліла ў сваім выступе Святлана Кліменценка.
