Уносяцца зьмены і дапаўненьні ў крымінальнае заканадаўства
Палата прадстаўнікоў Нацыянальнага сходу Беларусі сёння прыняла ў першым чытанні змяненні ў Крымінальны, Крымінальна-працэсуальны і Крымінальна-выканаўчы кодэксы.
Прадстаўляючы законапраект, першы намеснік старшыні Дзяржаўнага пагранічнага камітэта Беларусі Вадзім Зайцаў растлумачыў, што прадугледжваецца ўстанаўленне крымінальнай адказнасці за наўмыснае незаконнае перасячэнне дзяржаўнай граніцы з выкарыстаннем механічнага транспартнага сродку, судна, паветранага судна.
Ён адзначыў, што на працягу апошніх пяці гадоў расце колькасць незаконных перасячэнняў дзяржаўнай граніцы на аўтамабілях, у прыватнасці на машынах павышанай праходнасці, якія выкарыстоўваюцца ў асноўным для перамяшчэння праз граніцу падакцызных тавараў.
Вадзім Зайцаў удакладніў, што ў дзеючым заканадаўстве прадугледжвалася крымінальная адказнасць толькі для асоб, якія наўмысна незаконна перасяклі граніцу паўторна. Ён прывёў прыклад 2006 года, калі грамадзянін Літвы на лёгкаматорным самалёце незаконна перасек беларуска-літоўскую граніцу і быў пакараны за гэта толькі ў адміністрацыйным парадку.
Акрамя таго, змяненні і дапаўненні ў Крымінальна-працэсуальны і Крымінальна-выканаўчы кодэксы ўстановяць парадак прадаўжэння і прыпынення прэвентыўнага нагляду ў адносінах да асоб, прыгавораных да пакарання ў выглядзе абмежавання волі, арышту або накіраваных у лячэбна-працоўныя прафілакторыі.
Законапраект удакладняе абавязкі асобы, якая знаходзіцца пад прэвентыўным наглядам, а таксама парадак спынення прэвентыўнага нагляду.
