Сёння пачалі судзіць журналіста “Комсомольской правды” Генадзя Мажэйку
У Мінскім гарадскім судзе 1 снежня пачаўся разгляд крымінальнай справы палітзняволенага Генадзя Мажэйкі. Генадзя абвінавачваюць у распальванні іншай сацыяльнай варожасці (ч. 1 арт. 130 КК) і ў абразе Лукашэнкі (ч. 1 арт. 368 КК). Працэс вядзе суддзя Таццяна Фалькоўская.
- Генадзь Мажэйка
На першае пасяджэнне прыйшлі сваякі журналіста і некалькі яго калегаў.
Журналіст не прызнаў сваёй віны паводле прад'яўленых яму абвінавачванняў.
Дзяржабвінаваўца агучыў некалькі хадайніцтваў – далучыць да матэрыялаў справы характарыстыку з месца працы Генадзя. Заключэнне камісіі псіхолагаў і лінгвістаў адносна зместу артыкула Мажэйкі, відэа сустрэчы дэпутата Валера Варанецкага з выбаршчыкамі, дзе прысутнічаў Генадзь Мажэйка.
Адвакат Сяргей Кротаў папрасіў выклікаць у суд дэпутата, а таксама іншых сведкаў, якіх апыталі падчас следства.
Як гучыць абвінавачванне Генадзю
Згодна з тэкстам абвінавачвання, “Генадзь Мажэйка, праяўляючы амаральны інтарэс да экстрэмісцкай дзейнасці, з’яўляючыся яе прыхільнікам, дзейнічаючы паводле матываў палітычнай і ідэалагічнай варожасці, у перыяд з 23 чэрвеня 2020 года па кастрычнік 2021 здзейсніў шэраг злачынстваў”.
Выказванні журналіста ў інтэрнэце ў бок Лукашэнкі суд расцаніў, як “негатыўныя, непрыстойныя, недапушчальныя”.
Таксама Генадзю ставяць у віну, што ён, знаходзячыся на сустрэчы з выбаршчыкамі, якую ладзіў дэпутат Валер Варанецкі, “падтрымліваючы апазіцыйна настроеных удзельнікаў сустрэчы, праводзіў агітацыю супраць дзеючай улады, парушаючы агульначалавечую мараль”.
Дзяржабвінаваўца працытаваў выказванні палітзняволенага ў бок Лукашэнкі з сустрэчы з выбаршчыкамі: “З аўтаматам бегаць (…) хіба можа нармальны чалавек з аўтаматам бегаць (…) гэта звар’яцелы вырадак”.
Нагадаем, Генадзя затрымалі ў Маскве 1 кастрычніка 2021 года. Згодна з папярэднімі звесткамі, затрыманне звязанае з артыкулам "Камсамольскай праўды", у якім знаёмая загінулага Андрэя Зельцэра станоўча пра яго адгукнулася. Менавіта аўтарства Генадзя стаяла пад гэтым тэкстам.
Падтрымайце палітвязня: СІЗА-1. 220030, г. Мінск, вул. Валадарскага, 2 (Генадзь Мікалаевіч Мажэйка)
