"Пасля падзеяў у Казахстане не стрымаўся": вынесены прысуд жыхару Мінска Міхаілу Нямцову
Ілюстратыўнае фота
У Мінскім абласным судзе 14 лістапада завяршыўся разгляд крымінальнай справы 34-гадовага жыхара сталіцы Міхаіла Нямцова. Яго абвінавацілі ў распальванні іншай сацыяльнай варожасці па ч.1 арт. 130 Крымінальнагат кодэкса і ў абразе прэзідэнта (ч.1 арт 368).
Справу разглядала суддзя Ірына Майко.
Па матэрыялах абвінавачання, Міхаіл Нямцоў 5 студзеня 2022 года з дапамогай мабільнага тэлефона iPhone размясціў у мессенджер Telegram паведамленне, у якім змяшчалася відавочна негатыўная ацэнка асоб, якія служаць у арміі і ўнутраных войсках Расійскай Федэрацыі і Рэспублікі Беларусь. Гэтыя ацэнкі звязаныя з падзеямі ў Казахстане, калі там адбыліся хваляванні і гібель мірных пратэстоўцаў. У публікацыі, як сцвярджае следства, Нямцоў выкарыстаў ненарматыўную лексіку, заклікаў да гвалтоўных дзеянняў у дачыненні да названай групы асоб.
Акрамя таго, 6 студзеня 2022 года абвінавачаны размясціў у сетцы Інтэрнэт паведамленне, у якім прыніжаў гонар і годнасць Прэзідэнта Рэспублікі Беларусь.
Судовы працэс доўжыўся з 6 кастрычніка.
З улікам прадстаўленых дзяржаўным абвінаваўцам доказаў судовая калегія па крымінальных справах Мінскага абласнога суда пастанавіла абвінаваўчы прысуд.
На падставе ч. 1 арт. 130 ч. 1 арт. 368 Крымінальнага кодэкса Рэспублікі Беларусь Нямцову па сукупнасці злачынстваў прызначана канчатковае пакаранне ў выглядзе пазбаўлення волі на тэрмін тры гады з адбываннем у папраўчай калоніі ва ўмовах агульнага рэжыму.
