Камісарка Савета Еўропы па правах чалавека заклікала краіны-сябры падтрымаць расійскіх і беларускіх праваабаронцаў

Камісарка Савета Еўропы па правах чалавека Дуня Міятавіч заклікала краіны-сябры Савета Еўропы аказваць больш падтрымкі расійскім і беларускім праваабаронцам.

"Нядаўняе прысуджэнне Нобелеўскай прэміі міру і прэміі Вацлава Гавела праваабаронцам з Расіі, Беларусі і Украіны з'яўляецца дадатковым прызнаннем міжнароднай супольнасцю той надзвычай важнай ролі, якую праваабаронцы выконваюць у прасоўванні і абароне правоў чалавека для ўсіх, асабліва падчас вайны і крызісу, падобных цяперашняму", — адзначыла Міятавіч.

Яна звярнула ўвагу на тое, што праваабаронцы ў цяперашні момант "маюць патрэбу ў больш рашучай падтрымцы з боку дзяржаў-сябраў Савета Еўропы". Яна таксама прапанавала чатыры меры падтрымкі, неабходныя цяпер:

• публічна асудзіць парушэнні ў дачыненні да расійскіх і беларускіх праваабаронцаў, асабліва калі яны сутыкаюцца "з ростам судовага пераследу за іх процідзеянне вайне". Таксама заклікаць да вызвалення праваабаронцаў і прыцягнення да адказнасці тых, хто вінаваты ў пераследзе;
• аказаць падтрымку тым, хто застаецца ў Расіі і Беларусі і працягвае абараняць правы чалавека.

"У прыватнасці, варта працягваць і павялічваць фінансавую дапамогу, гарантуючы пры гэтым бяспеку бенефіцыяраў", — мяркуе Міятавіч.

• дапамагчы праваабаронцам і іх сем'ям бяспечна перасяліцца ў краіны Савета Еўропы. У тым ліку, забяспечыць доступ да хуткага афармлення віз і гарантаваць абарону ад экстрадыцыі;
• вылучыць сталае месца жыхарства ў краінах, якія іх прымаюць, палегчыць працу і забяспечыць сацыяльнымі льготамі праваабаронцаў і іх сем'і. 

"Праваабаронцы, валанцёры і незалежныя журналісты, у тым ліку з Расіі і Беларусі, граюць важную ролю ў кантэксце росту вайны ва Украіне. Яны робяць нястомны ўнёсак у падвышэнне інфармаванасці і данясенне праўды да грамадства, часам рызыкуючы ўласнай свабодай, бяспекай і нават жыццём", — заявіла Міятавіч.

Нобелеўскую прэмію міру сёлета атрымалі палітзняволены праваабаронца і заснавальнік "Вясны" Алесь Бяляцкі, расійская праваабарончая арганізацыя "Мемарыял" і ўкраінская праваабарончая арганізацыя "Цэнтр грамадзянскіх свабод".