"Навошта вы падпісаліся на канал "Пул Першага?" У Віцебску вынесены прысуд за абразу Лукашэнкі і Караева
Яўген Гукаў
Суд Першамайскага раёна Віцебска 14 верасня асудзіў мясцовага жыхара Яўгена Гукава, абвінавачанага ў абразе прэзідэнта (ч. 1 арт. 368 Крымінальнага кодэкса) і абразе прадстаўніка ўлады (арт. 369 Крымінальнага кодэкса).
Справу разглядаў суддзя Міхаіл Юрчанка, дзяржабвінававаўца — памочнік пракурора Віцебска Антон Ананенка.
Яўген быў затрыманы 20 чэрвеня 2022 года і да суда змешчаны ў СІЗА г. Віцебска.
Па матэрыялах абвінавачання, работнік прадпрыемства “Альянс-Пластык” Яўген Гукаў у перыяд часу з 20 кастрычніка па 20 лістапада 2020 года шматразова ў тэлеграм-чатах “Вуліца Гагарына” і “Віце*ск-97” размяшчаў відэаролік выступу Аляксандра Лукашэнкі на канале “Пул Першага”, які суправаджаў абразлівымі і нецэнзурнымі каментарыямі, з выкарыстаннем ненарматыўнай формай маўленчага выказвання.
“А навошта вы падпісаліся на канал “Пул Першага”? З якой мэтай?" — дапытваўся суддзя ў абвінавачанага.
Таксама 28 кастрычніка на адным з тэлеграм-каналам абразіў былога міністра ўнутраных спраў Юрыя Караева.
Падчас допыту ў судзе Гукаў патлумачыў, што ў 2021 годзе быў двойчы прыцягнуты да адміністрацыйнай адказнасці паводле арт. 19.11 КаАП, быў аштрафаваны, а летам 2021 года свой тэлефон наўмысна ўтапіў у Заходняй Дзвіне.
Сваю віну у судзе Гукаў прызнаў цалкам.
У суд прадстаўленыя станоўчыя характарыстыкі з месца працы і жыхарства.
Абвінавачанне запрасіла для Гукава па арт. 369 Крымінальнага кодэкса — абмежаванне волі з накіраваннем ва ўстанову адкрытага тыпу тэрмінам на два гады, па ч. 1 арт. 368 — два гады пазбаўлення волі ва ўмовах агульнага рэжыму. Па сукупнасці пакаранняў канчаткова прызначыць два гады пазбаўлення волі ў калоніі агульнага рэжыму.
Суд пастанавіў прызнаць Яўгена Гукава вінаватым і прызначыў яму пакаранне ў выглядзе пазбаўлення волі тэрмінам на адзін год і 10 месяцаў у калоніі агульнага рэжыму.
