Чашнікі: хлопец намаляваў беларускі і ўкраінскі сцягі на тэрыторыі вайсковага пахавання і зрабіў "экстрэмісцкія" надпісы на трубе — 2,5 года "хіміі"
Ілюстрацыйнае фота. Крыніца: shraibikus.com
Праваабаронцам сталі вядомыя вынікі судовага разбіральніцтва па справе Сцяпана Хадатовіча, якога абвінавачвалі ў апаганьванні збудаванняў і псаванні маёмасці па крымінальным артыкуле 341.
Справу разглядала суддзя суда Чашніцкага раёна Таццяна Заруба.
Сцяпану Хадатовічу з Новалукомля 23 гады. Яго абвінавачвалі ў тым, што ў сакавіку гэтага года ён "зрабіў экстрэмісцкія надпісы на трубаправодзе Лукомльскай ГРЭС", а яшчэ праз два месяцы "нанёс на паверхню артылерыйскай прылады, усталяванай на тэрыторыі вайсковага пахавання ў вёсцы Старыя Лаўкі Чашніцкага раёна, выявы бел-чырвона-белага і сіне-жоўтага сцягоў".
26 жніўня суд прызнаў Сцяпана Хадатовіча вінаватым па арт. 341 КК, прызначыўшы яму ў якасці пакарання 2,5 года абмежавання волі з накіраваннем у папраўчую ўстанову адкрытага тыпу.
