Пачалі судзіць стрыечнага брата Латушкі Анатоля і яшчэ дзвюх палітзняволеных
У судзе Цэнтральнага раёна Мінска сёння пачаўся разгляд крымінальнай справы адразу ў адносінах да трох палітзняволеных Анатоля Латушкі, Ліліі Ананян, Алены Маліноўскай. Іх затрымалі 31 студзеня за маляванне па трафарэце на паштовых скрынях у пад'ездах жылога дома герб "Пагоня" і змясцілі пад варту. Цяпер іх судзяць агулам па пяці артыкулах Крымінальнага кодэкса. Палітвязень Анатоль Латушка — стрыечны брат палітыка Паўла Латушкі. 25 жніўня ў межах арт. 342 Крымінальнага кодэкса затрымалі яго жонку — Алену. Справу разглядае суддзя Дзмітрый Карсюк.
- Павел Латушка, Лілія Ананян, Алена Маліноўская
Палітвязняў затрымалі ноччу 31 студзеня за тое, што нібыта яны малявалі па трафарэце на паштовых скрынях у пад'ездах жылога дома герб "Пагоня". Вядома, што пасля затрымання Анатоля моцна збілі.
Згодна з версіяй абвінавачвання, яны неаднаразова на працягу 2021 года "пашкодзілі з хуліганскіх памкненняў маёмасці некалькіх унітарных прадпрыемстваў на суму больш за тры тысячы рублёў, у тым ліку шляхам нанясення фарбавальных рэчываў рознага роду надпісаў і малюнкаў" (ч. 2 арт. 339 Крымінальнага кодэкса); "перашкаджалі ажыццяўленню грамадзянамі права на ўдзел у рэспубліканскім рэферэндуме па пытанні ўнясення змяненняў і дапаўненняў Канстытуцыі Рэспублікі Беларусь шляхам вырабу і размяшчэння ў агульнадаступных месцах улётак, якія змяшчалі заклікі да зрыву і звесткі аб нібыта парушэннях у правядзенні рэферэндуму" (ч. 2 арт. 191 Крымінальнага кодэкса); "здзеку над дзяржаўным сцягам шляхам спалення палотнішча ў снежні 2021 года і запісу дадзеных дзеянняў на відэа з мэтай размяшчэння ў інтэрнэце" (арт. 370 Крымінальнага кодэкса).
Таксама Анатолю Латушку інкрымінуюцца "незаконныя збор і распаўсюд інфармацыі аб прыватным жыцці і персанальных дадзеных асоб у сувязі з выкананнем імі грамадскага абавязку шляхам размяшчэння ў розных агульнадаступных месцах улётак, якія змяшчаюць дадзеныя, якія складаюць асабістую і сямейную таямніцу пацярпелых" (ч. 3 арт. 203-1 Крымінальнага кодэкса); "актыўны ўдзел 18 кастрычніка 2020 года ў групавых дзеяннях, якія груба парушаюць грамадскі парадак" (ч. 1 арт. 342 Крымінальнага кодэкса).
Падтрымайце палітзняволеных лістамі, пасылкамі, грашовымі пераводамі: СІЗА-1, 220030, г. Мінск, вул. Валадарскага, 2, Алена Віктараўна Маліноўская, Анатоль Віктаравіч Латушка, Лілія Лернікаўна Ананян
