"Мой дом ужо не мая крэпасць": чарговы прысуд за абразу загінулага супрацоўніка КДБ
Суд Бярозаўскага раёна.
У судзе Бярозаўскага раёна 28 ліпеня вынесены прысуд жыхарцы Белазёрска Крысціне Чайчыц, якая пакінула каментары ў інтэрнэце пасля гібелі ў мінскай кватэры супрацоўніка КДБ Дзмітрыя Федасюка. Тым самым, паводле версіі следства, здзейсніла абразу прадстаўніка ўлады (арт. 369 Крымінальнага кодэкса).
Справу разглядала суддзя Алена Нямкова.
Згодна з матэрыяламі абвінавачання, Чайчыц, даведаўшыся пра гібель Андрэя Зельцэра і супрацоўніка КДБ Федасюка, 29 верасня 2021 года, у адным з чатаў у сацыяльнай сетцы Тэлеграм пакінула каментар аб тым, што “мой дом ужо не мая крэпасць” і пра тое, што “нідзе няможна схавацца ад гэтых тварынаў”. Менавіта гэтыя словы следства палічыла абразай прадстаўніка ўлады. Што ў судзе было пацверджана вынікамі лінгвістычнай экспертызы.
Крысціна Чайчыц – маці дваіх непаўнагадовых дзяцей, на судзе абараняла сябе сама, ад паслуг адваката адмовілася. Віну ў здзейсненым прызнала цалкам.
Суд пастанавіў пакараць Крысціну Чайчыц абмежаваннем волі без накіравання ва ўстанову адкрытага тыпу тэрмінам на два гады і штрафу ў памеры 50 базавых велічынь.
