Асудзілі дзяўчыну, якая абразіла ўчастковага інспектара, нібыта датычнага да смерці Рамана Бандарэнкі
Кацярына Пазушка
Суд Цэнтральнага раёна Мінска 17 чэрвеня вынес прысуд Кацярыне Пазушка, абвінаваціўшы яе ў абразе прадстаўніка ўлады (арт. 369 Крымінальнага кодэкса).
Справу разглядала суддзя Вікторыя Шабуня, дзяржабвінаваўца – памочнік пракурора Арцём Цвяткоў.
Кацярына была затрыманая з 5 па 7 траўня, затым да суда вызваленая пад паручальніцтва.
Пацярпелым па справе выступае ўчастковы інспектар міліцыі Цэнтральнага ОУУС Мінска Артур Кохан.
Па матэрыялах абвінавачання, Кацярына Пазушка вечарам 12 лістапада 2020 года з пачуцця непрыязнасці да прадстаўнікоў улады, выкарыстоўваючы мабільны тэлефон, у чаце групы "Карнікі Беларусі” наўмысна падрыхтавала і апублікавала тэкст каментара, які змяшчае выяўленыя ў непрыстойнай грубай форме абразы ў адрас Кохана з выкарыстаннем ненарматыўнай формы маўленчага выказвання.
У судовым пасяджэнні Пазушка вінаватай сябе ў інкрымінаваным ёй дзеянні прызнала ў поўным аб'ёме.
Суду патлумачыла, што убачыўшы ў чаце групы "Карнікі Беларусі" публікацыю пра супрацоўніка міліцыі і пра яго нібыта датычнасць да смерці Рамана Бандарэнкі, эмацыйна адрэагавала падобным чынам.
Суд пастанавіў прызначыць Кацярыне Пазушка пакаранне ў выглядзе абмежавання волі на тэрмін два гады без накіравання ў папраўчую ўстанову адкрытага тыпу.
