Суд над гомельскім краязнаўцам і вандроўнікам Ігарам Галушкам пройдзе ў закрытым рэжыме
Ігар Галушка. Фота з сацыяльных сетак
У Гомельскім абласным судзе 30 чэрвеня пачынаецца разгляд крымінальнай справы краязнаўцы і вандроўніка Ігара Галушкі. Палітзняволенага абвінавачваюць у распальванні сацыяльнай варожасці альбо варажнечы (ч. 1. арт. 130 Крымінальнага кодэкса) і абразе прэзідэнта Беларусі (ч. 1 арт. 368 Крымінальнага кодэкса). Справа была распачата за каментарыі на палітычную тэму ў перыяд 2020-2021 гадоў.
Справу будзе разглядаць суддзя Аляксей Хлышчанкоў.
Ігар Віктаравіч Галушка — вядомы ў Гомелі грамадскі дзеяч, турыст са стажам у 40 гадоў і арганізатар пешых паходаў. Галушку затрымалі 1 сакавіка 2022 года і да суда ўтрымлівалі ў СІЗА № 3 г. Гомеля.
Як стала вядома праваабаронцам, у раскладзе судовых пасяджэнняў Гомельскага абласнога суда па стане на 30 чэрвеня пазначана, што працэс над Ігарам Галушкам пройдзе ў закрытым рэжыме. Гэта азначае, што у суд не патрапяць ні сваякі, ні сябры абвінавачанага.
