Яшчэ больш жорсткія ўмовы для палітвязняў, “бандыцкія” ператрусы і дзесяткі новых “экстрэмістаў”: хроніка пераследу 4-7 чэрвеня
У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў. Незалежныя медыяпрадукты прызнаюць экстрэмісцкімі матэрыяламі. Праваабарончы цэнтр "Вясна" збірае апошнія факты палітычнага пераследу.
|
Калі вас ці вашых блізкіх затрымалі, паведамляйце нам:
|
Ператрусы і затрыманні
- Сяргей Гунь
Стала вядома пра затрыманне на ўласным лецішчы Сяргея Гуня, якое адбылося яшчэ 3 чэрвеня. Яго блізкія паведамляюць, што па папярэдняй інфармацыі мужчыну затрымалі паводле арт. 342 КК “Арганізацыя дзеянняў, што груба парушаюць грамадскі парадак, ці актыўны ўдзел у іх”. Раней Сяргея затрымлівалі па адміністрацыйных артыкулах. Падчас аднаго з затрыманняў, у кастрычніку 2020-га, сілавікі выцягнулі мужчыну з машыны і збілі, бо заўважылі, што ён засняў амапаўцаў на відэа.
- Дзмітрый Суслаў
Гэтым жа днём у Бабруйску на працоўным месцы затрымалі журналіста мясцовай газеты “Коммерческий Курьер” Дзмітрыя Суслава. Супрацоўнікі РАУС прыйшлі ў рэдакцыю выдання і, не патлумачыўшы прычын, забралі мужчыну. Вядома, што да позняга вечара Суслава трымалі ў РАУС, пасля чаго адправілі ў ІЧУ. У панядзелак, 6 чэрвеня, стала вядома, што Суславу прысудзілі 15 сутак адміністрацыйнага арышту. Яго асудзілі па артыкуле 19.11 КаАП "Распаўсюд экстрэмісцкіх матэрыялаў". Суд адбыўся на тэрыторыі ізалятара часовага ўтрымання.
- Наталля Дуліна
Таксама з’явіліся дадзеныя пра арышт на 15 сутак экс-дацэнткі МДЛУ Наталлі Дулінай. Гэта яе трэцяе затрыманне за апошнія тры месяцы. Гэтым разам яе абвінавацілі ў "дробным хуліганстве" па арт. 19.1 КаАП — яна нібыта "размахвала рукамі і нецэнзурна лаялася". Хадайніцтва аб праглядзе камер відэаназірання суддзя адхіліла. Першы раз Наталлю затрымлівалі 28 лютага за антываенную акцыю і арыштавалі на 15 сутак за "удзел у несанкцыянаваным пікетаванні" (арт. 24.23 КаАП). Праз месяц — 25 красавіка — яе затрымалі дома, а потым асудзілі на 15 сутак арышту за "захоўванне інфармацыйнай прадукцыі канала на YouTube з назвай "Радыё Свабода" (арт. 19.11 КаАП).
- Арцём Чачоткін
4 чэрвеня на Фестывалі нацыянальных культур у Гродне ГУБАЗіК затрымаў Арцёма Чачоткіна. Прычына — "распаўсюд экстрэмісцкіх матэрыялаў", у тым ліку на папяровых носьбітах. Гродзенца змясцілі ў ІЧУ. Затрыманне правялі на вачах у спадарожніцы мужчыны — ён паспеў аддаць ёй заплечнік.
- Ціна Палынская
5 чэрвеня адбыўся ператрус у журналісткі Ціны Палынскай. Пра гэта распавёў яе муж Аляксандр. Паводле яго, Ціну арыштавалі. За што — невядома. Праз некалькі гадзіна журналістку адпусцілі, але забралі ў яе тэхніку.
- Валерый Ільючык
6 чэрвеня з’явілася інфармацыя пра затрыманне былога 37-гадовага памежніка Валерыя Ільючыка — ён звольніўся пасля падзей 2020 года. Згодна з інфармацыяй у канале ГУБАЗіКа, Валерый звяртаўся па дапамогу ў фонд BySol. Аднак ніякіх канкрэтных абвінавачанняў супраць мужчыны, як і прычына затрымання, не агучваецца.
- Валерый Цапкала
У доме Валерыя Цапкалы правялі ператрус. Па звестках тэлеграм-канала "Нік і Майк", у доме былі разбітыя вокны, посуд, разламана мэбля і раскіданы рэчы. Валерый Цапкала — ініцыятар і стваральнік Беларускага Парку высокіх тэхналогій, былы амбасадар Беларусі ў ЗША і Мексіцы. У 2020-м годзе ён абвясціў пра планы балатавацца ў прэзідэнты Беларусі, аднак не быў дапушчаны да ўдзелу ў выбарах.
- Фотаздымкі пасля ператрусу ў доме Валерыя Цапкалы
Нагадаем, раней ГУБАЗіК публікаваў відэа, на якіх хваліўся, як разграміў кватэры рэдактаркі "Карателей Беларуси" і ютуб-канала "Дзікае паляванне" Яніны Сазановіч, грамадскага дзеяча Вадзіма Пракоп'ева, а таксама блогера Андрэя Павука.
7 чэрвеня стала вядома, што у офіс гандлевай сеткі "ОМА" прыйшлі сілавікі. @zerkalo_io паведамляе, што пад будынкам стаяць чорныя бусікі. Вядома, што раней буйны акцыянер сеткі прыпыніў дзейнасць у Беларусі, кампанія перастала закупляць беларускія і расійскія тавары праз напад Расіі на Украіну.
Папаўленне ў спісе экстрэмістаў
У спіс экстрэмісцкіх матэрыялаў дадалі ажно 49 новых пазіцый. У яго ўключылі дзевяць лакальных тэлеграм-чатаў, тры youtube-каналы, звязаныя з праектам Nexta, іх старонкі і матэрыялы ў сацсетках (Telegram, Facebook, "Вконтакте", Instagram). Таксама "экстрэмісцкімі" прызнаны сайты ініцыятыў By_help, Media Solidarity Belarus, BYSOL, voicesfrombelarus. com, іх матэрыялы ў сацсетках (Telegram, Facebook, "Вконтакте", Instagram). У пералік уключылі сайт "платформы фінансавання перамен" digitalsolidarity. io, старонкі ініцыятывы ў Instagram і Facebook, мабільны дадатак у крамах App Store і Google Play. Акрамя таго, спіс дапоўнены асабістымі Facebook-старонкамі ў сацыяльных сетках актывістаў Андрэя Стрыжака, Аляксея Лявончыка, Яраслава Ліхачэўскага і Аляксея Кузьмянкова (Alexis Kendoo). "Экстрэмісцкімі" таксама прызнаны telegram- і youtube-каналы Стрыжака. Суд прысвоіў аналагічны статус персанальным старонкам у Instagram актывістак Марыі Забары і Аляксандры Зверавай.
Працягваецца ціск на палітвязняў
- Палітвязень Арцём Мядзведскі
4 чэрвеня з’явіліся дадзеныя, што палітвязня Арцёма Мядзведскага, які ў лютым збег з "хіміі", перавялі ў калонію "Воўчыя норы". Нагадаем, у пачатку лютага Арцём здолеў уцячы з папраўчай установы №45. Збег з лякарні ў Камянцы, куды трапіў з лёгкім страсеннем мазгоў пасля таго, як паслізнуўся і зваліўся ў будынку ПУАТ. Але праз некаторы час Арцёма затрымалі і вярнулі ў ПУАТ. У канцы красавіка ў судзе Камянецкага раёна суддзя Аксана Шкель пастанавіла перавесці Мядзведскага з "хіміі" ў калонію тэрмінам на 9 месяцаў. Стала вядома, што адбываць тэрмін Арцёма накіравалі ў папраўчую калонію №22.
Арцёма затрымалі 19 кастрычніка 2020 года. Яго абвінавацілі ў тым, што ўвечары 10 жніўня ён ўдзельнічаў у акцыі пратэсту каля ст. м. Пушкінская, выкаціў на дарогу камень, што прывяло да блакавання праезнай часткі. 15 студзеня 2021 года палітвязню прысудзілі 3 гады "хіміі".
|
Падтрымайце палітвязня лістамі салідарнасці. Адрас такі: ПК №22, 225295, Брэсцкая вобласць, г. Івацэвічы, ст. Даманава, а/с 20. Арцему Мядзведскаму |
- Aляксандр Плескацэвіч
Па інфармацыі MAYDAY TEAM, на палітзняволенага Аляксандра Плескацэвіча цісне адміністрацыя папраўчай установы № 43. Яго змясцілі ў ШІЗА на 20 сутак. У канцы траўня яго каралі «суткамі» ў штрафным ізалятары два разы запар: першыя 10 сутак былі за «неахайны выгляд», а потым яшчэ 10 — за «адмову прыбіраць месца агульнага карыстання».
Нагадаем, Аляксандра абвінавацілі паводле ч.1 і ч.2 арт. 339 КК "Хуліганства" за тое, што ён пакінуў надпісы і расфарбоўваў белай і чырвонай фарбамі хаты, слупы і будынкі ў сваёй вёсцы. Адзін з надпісаў — “Света, я вас кахаю”. У выніку, у судзе Ляхавічаў 6 снежня Плескацэвіча асудзілі на 2 гады "хіміі".
|
Падтрымайце палітвязня лістамі салідарнасці. Адрас такі: Папраўчая ўстанова адкрытага тыпу № 43. 212003, г. Магілёў, вул. Чалюскінцаў, 76А, Аляксандру Іосіфавічу Плескацэвічу. |
- Мікіта Емяльянаў. Фота: svaboda.org
7 чэрвеня стала вядома, што палітвязень Мікіта Емяльянаў ужо 35 дзён знаходзіцца ў карцары. 4 чэрвеня ён павінен быў выйсці пасля 30-сутачнага арышту, але яму дадалі яшчэ 7 сутак. Мікіту ўвесь гэты час караюць за адмову прыбіраць дворык падчас прагулкі. Апеляцыйную скаргу палітзняволенага анархіста суддзя Магілёўскага абласнога суда Мікалай Гладкі разгледзіць 9 чэрвеня ў 10:30.
Нагадаем, 11 сакавіка Емяльянава асудзілі на два гады калоніі па ч. 2 арт. 411 КК "Злоснае непадпарадкаванне патрабаванням адміністрацыі папраўчай установы за парушэнне правілаў унутранага распарадку”, а канчаткова прызначылі па сукупнасці прысудаў з улікам раней неадбытага пакарання — тры з паловай гады калоніі ўзмоцненага рэжыму.
|
Падтрымайце палітвязня лістамі салідарнасці. Адрас такі: Турма №4, 212011, г. Магілёў, вул. Крупскай, 99А, Емяльянаву Мікіце Уладзіміравічу. |
Ад сваякоў палітвязняў праваабаронцы даведаліся пра тое, што зняволеным наўмысна пачалі скарачаць тэрмін працяглага спаткання. Да прыкладу, адміністрацыя папраўчых калоній № 1 і № 15 скарачае тэрмін працяглага спаткання да аднаго дня. Пры гэтым, згодна з правіламі ўнутранага распарадку калоній, працяглыя спатканні могуць доўжыцца да трох сутак. На які тэрмін выдаваць дазвол, вырашае адміністрацыя калоніі. Па словах сваякоў і саміх палітвязняў, гэта тычыцца тых, каго ў калоніі лічаць "злоснымі парушальнікамі рэжыму"; хто адбывае тэрмін на ўзмоцненым рэжыме; каго закідвалі ў ШІЗА; у каго ёсць больш за два спагнанні; у дачыненні да каго быў выстаўлены пазоў за падзеі 2020 года, і які яны не выплацілі. Але афіцыйнай заявы пра гэта не было. Новае "правіла" пачало працаваць з 1 чэрвеня, паведамляюць блізкія палітвязняў.
Што варта ведаць пра спатканні з вязнямі?
