У Берасці грамадзянку Расіі пакаралі пазбаўленнем волі за паклёп на прэзідэнта

2021 2021-09-20T11:30:43+0300 2021-09-20T13:10:03+0300 be https://spring96.org/files/images/sources/vikholm_iryna-2.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Ірына Вікхольм. Фота з сацыяльных сетак

Ірына Вікхольм. Фота з сацыяльных сетак

Маскоўскі суд Берасця вынес 20 верасня прысуд па крымінальнай справе грамадзянкі Расіі, палітзняволенай  Ірыны Вікхольм. Яе абвінавачвалі ў паклёпе прэзідэнта Беларусі (ч. 2 арт.367 КК РБ).

Справу разглядаў суддзя Яўген Брэган. Дзяржабвінаваўца - пракурор  Аляксандр Бацюшко.

Ірыну Вікхольм затрымалі  ў Берасці 28 мая 2021 года за твіт, які яна змясціла 23 мая ў Twitter. Спасылка была на перадрук матэрыялу Рускай службы BBC пра інцыдэнт з самалётам Ryanair, перахопленым у небе Беларусі, каб затрымаць Рамана Пратасевіча.

У той дзень, 28 мая, бліжэй да вечара, яе запрасілі на гутарку ў аддзел па грамадзянстве і міграцыі. Затым у кватэры, дзе жыла Ірына, правялі ператрус, забралі ноўтбук. Яе  змясцілі ў ІЧУ Ленінскага РАУС Берасця на 3 сутак. Пасля перавялі ў  СІЗА, дзе яна прабыла з 1 чэрвеня па 5 жніўня. Затым Вікхольм адправілі на экспертызу ў Мінск у РНПЦ псіхічнага здароўя, і вярнулі ў СІЗА-7.

Пра ўмовы ўтрымання ў Берасцейскім СІЗА Ірына адзначыла, што яе прымушалі казаць пра "схільнасць да экстрэмісцкай дзейнасці". А ў прадстаўленай у суд характарыстыцы начальства СІЗА-7 напісала пра Вікхольм, што жанчына схільная да экстрэмізму і нібыта не жадае самаразвівацца. Для Ірыны такая характарыстыка апынулася нечаканасцю, суду яна сказала, што ўсё наадварот, кнігі (у тым ліку для развіцця) ёй у СІЗА адмаўляліся выдаваць, паведамляе  канал "Вясна-Брэст".

На судзе Вікхольм заяўляла адвод суддзі, адвод дзяржабвінаваўцу (абодва адводы суддзя не задаволіў), адмовілася ад прызначанага ёй адваката. На судзе жанчына заяўляла, што крымінальная справа ў дачыненні да яе відавочна мае палітычны матыў.

Вікхольм падпісала рэпост так: "Чарговае злачынства Лукашэнкі: акт дзяржаўнага авіяпірацтва", прычым фраза "акт дзяржаўнага авіяпірацтва" прыводзілася ў тэксце BBC.

Пра далейшы лёс жанчыны пасля затрымання стала вядома толькі праз тры месяцы. 1 верасня 2021 года пракуратура Беларусі паведаміла, што ў суд накіраваная крымінальная справа аб "публічным паклёпе" на Аляксандра Лукашэнку, абвінавачваецца ў ёй "замежная грамадзянка В.".

Падчас папярэдняга следства абвінавачаная віну не прызнала.

Ірына пражыла ў Берасці амаль 10 гадоў, у інтэрнэце вяла блог на некалькіх пляцоўках.

Беларускай праваабарончай супольнасцю Ірына Вікхольм прызнаная палітычнай зняволенай.

Сёння суддзя Яўген Брэган вынес прысуд: прызнаць вінаватай і пакараць пазбаўленнем волі на паўтара года ў калоніі агульнага рэжыму.

Апошнія навіны

Партнёрства

Сяброўства