viasna on patreon

Палітвязня Аляксея Ліпеня асудзілі за паўгады у чацверты раз

2021 2021-09-07T15:50:11+0300 2021-09-07T17:27:54+0300 be https://spring96.org/files/images/sources/lipen_a.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Аляксей Ліпень

Аляксей Ліпень

У судзе Заводскага раёна 7 верасня разглядалася чарговая крымінальная справа, заведзеная на Аляксея Ліпеня за абразу службовай асобы (арт. 369 КК РБ).

Дагэтуль яго судзілі за абразу супрацоўнікаў міліцыі ў сацыяльных сетках тройчы: 13 красавіка, 31 мая, і 15 ліпеня. Агулам быў асуджаны на 5 год абмежавання волі ва ўстанове адкрытага тыпу.

Крымінальныя справы былі заведзеныя за тое, што на працягу двух месяцаў Аляксей пакідаў абразлівыя каментары і пагрозы ў адрас міліцыянтаў ў адным з тэлеграм-каналаў.

Беларускай праваабарончай супольнасцю Аляксей Ліпень прызнаны палітычным зняволеным.

Новую крымінальную справу разглядае суддзя Алена Капцэвіч.

У якасці чарговага пацярпелага выступае старшы ўчастковы інспектар міліцыі Светлагорскага РАУС, маёр міліцыі Аляксандр Перавядзенцаў.

Аляксея Ліпеня асудзілі на 5 гадоў "хіміі" і вызвалілі ў залі суда

Аляксей Ліпень неаднаразова, выкарыстоўваючы розныя нікнэймы, у тым ліку «савецкі малы», пакідаў абразлівыя каментары пад фота супрацоўнікаў міліцыі ў тэлеграм-канале «Карнікі Беларусі» ў перыяд з 29 кастрычніка па 18 снежня 2020 года.

Пацярпелы на пасяджэнне не з'явіўся з прычыны службовай занятасці і складанай эпідэміялагічнай сітуацыі. Аднак падаў матэрыяльны пазоў за маральныя пакуты ў памеры 3 000 рублёў.

Па матэрыялах следства, 30 лістапада 2020 года ў тэлеграм-канале “Карнікі Беларусі” было размешчана фота Перавядзенцава, а ў яго адрас быў напісаны каментар у абразлівай форме з нецэнзурнымі словамі.

“Мне пачалі казаць, што бачылі маё фота. Тады я зарэгістраваўся ў тэлеграм-канале і пабачыў той каментар. Там падпісана 60 000 чалавек,” – казаў пацярпелы па папярэднім допыце.

Ліпень у судзе тлумачыць:

“Я палічыў, што чалавек здзейсніў злачынства, напісаў толькі адно слова і выйшаў з інтэрнэту. Напісаў на эмоцыях. Раскайваюся ў зробленым, але пазоў не прызнаю”.

Суд пастанавіў пакараць Ліпеня штрафам у памеры 1 000 руб, без дабаўлення тэрміну абмежавання волі.

Па ранейшых судах абвінавачаны павінен быў сплаціць кампенсацыю нанесенай маральнай шкоды пацярпелым супрацоўнікам міліцыі ў памеры 5 500 рублёў і судовыя выдаткі ў памеры 522 рублі. Цяпер гэтая сума, з улікам новага матэрыяльнага пазову, істотна вырасла.

Апошнія навіны

Партнёрства

Сяброўства