11 месяцаў за кратамі. Муж праваабаронцы Марфы Рабковай распавёў пра яе стан
Ужо адзінаццаць месяцаў, як за кратамі ўтрымліваецца каардынатарка Валанцёрскай службы "Вясны" Марфа Рабкова. Супрацоўнікі ГУБАЗіКа затрымалі яе разам з мужам Вадзімам 17 верасня мінулага года, калі яна вярталася дадому з праваабарончай прэміі. Адразу ёй прад'явілі абвінавачванне — па ч. 2 арт. 293 Крымінальнага кодэкса (навучанне ці іншая падрыхтоўка асоб для ўдзелу ў масавых беспарадках). Цягам адзінаццаці месяцаў Марфе прад'явілі абвінавачванне яшчэ па двух артыкулах — цяпер ёй пагражае да 12 гадоў пазбаўлення волі. Увесь гэты час праваабаронцу ўтрымліваюць ў СІЗА-1, дзе яе паставілі на прафілактычны ўлік як «схільную да экстрэмізму». За гэтыя месяцы Марфа моцна схуднела, у яе праблемы са здароўем і памерлі бабуля і бацька. Следчыя неаднаразова прапаноўвалі ёй супрацоўніцтва: прызнаць віну — і тады ёй зменяць меру стрымання і адпусцяць да хворых бацькоў. Але Марфа прынцыповая ў сваёй пазіцыі. Муж палітзняволенай праваабаронцы Вадзім Жаромскі распавёў “Вясне”, як Марфа адчувае сябе цяпер.
- Ілюстрацыя Марфы Рабковай ад Amnesty International
Вадзім Жаромскі адзначыў, што пасля двухтыднёвага пасцельнага рэжыму праваабаронца стала лепей сябе адчуваць, аднак паўнавартасна ва ўмовах СІЗА нельга аднавіць здароўе. Колькасць медыкаментаў у перадачах за апошні перыяд значна ўзрасла ў параўнанні з восенню папярэдняга года. Як і раней, Марфе не даюць дазволу на лячэнне зубоў, хаця з моманту першых спробаў запрасіць стаматолага прайшло амаль тры месяцы.
Акрамя таго, пачаліся складанасці з ліставаннем: з канца вясны Марфа атрымоўвае лісты ў асноўным толькі ад родных. Часам па некалькі дзён ад яе няма вестак, аднак людзі пішуць ёй стабільна.
“Марфа пісала, што летам атрымала ліст ад жанчыны за нумарам 20, а да гэтага папярэдні ад яе ж – быў ліст пад нумарам 1 яшчэ восенню прошлага году. Пытанне, дзе згубіліся астатнія лісты, — рытарычнае”, — кажа Вадзім.
Па падліках Марфы Рабковай у красавіку, за паўгода ў зняволенні яна атрымала каля 550 лістоў. Цяпер гэтая колькасць відавочна ўзрасла. Асобна праваабаронца дзякуе неабыякавым людзям за пасылкі, якія яна атрымоўвае з прыемнымі дробязямі, што вельмі важныя ў зняволенні.
“Пры гэтым, самае галоўнае — гэта ўсведамленне ўвагі і таго, што яе не забылі і не кінулі”, — падкрэслівае муж Марфы Рабковай.
Пра сябе Вадзім надта не задумваецца, а проста робіць тое, што трэба.
“Трэба выстаяць!”, — кажа ён.
За кратамі знаходзяцца сем праваабаронцаў «Вясны». Пішыце нашым калегам і каляжанкам лісты салідарнасці:
- СІЗА-1, 220030, г. Мінск, вул. Валадарскага, 2 (Алесь Бяляцкі, Валянцін Стэфановіч, Уладзімір Лабковіч, Марфа Рабкова, Андрэй Чапюк)
- СІЗА-3, 246003, г. Гомель, вул. Кніжная, 1А (Леанід Судаленка, Таццяна Ласіца)
Калі вы атрымліваеце лісты ад вясноўцаў, калі ласка, паведаміце пра гэта нам у тэлеграме @Spring96info.
