Вынесены прысуд мадэратарцы чата "Жодзіна для жыцця" Лідзіі Коршун
Лідзія Коршун. Скрыншот з відэа МУС.
У судзе горада Жодзіна 7 ліпеня асудзілі мадэратарку чата "Жодзіна для жыцця" Лідзію Коршун. Дзяўчыне прад’яўленыя абвінавачванні па ч. 1 артыкула 342 Крымінальнага кодэксу за арганізацыю і падрыхтоўку дзеянняў, якія груба парушаюць грамадзкі парадак, а таксама па арт. 369 Крымінальнага кодэксу (абраза прадстаўніка ўлады).
Лідзію затрымалі 27 сакавіка прама з дома, дзе яна знаходзілася з паўтарагадовым дзіцём. Да суда была змешчаная ў следчую турму №8 Жодзіна.
Беларускай праваабарончай супольнасцю Лідзія Коршун была прызнаная палітычнай зняволенай.
Справу разглядаў суддзя Іван Грынкевіч.
Паводле інфармацыі прэс-службы УУС Мінскага аблвыканкама, дзяўчыну вылічылі супрацоўнікі Жодзінскага ГАУС і УУС Мінскага аблвыканкама «падчас мерапрыемстваў па недапушчэнні дэстабілізацыі грамадска-палітычнага становішча ў краіне».
Сцвярджаецца, што яна нібыта каардынавала "дваровы пратэсны рух у горадзе, заклікала да актыўных дзеянняў, пры гэтым сама заўсёды заставалася дома". Па паведамленні УУС, яна таксама публікавала абразы ў адрас міліцыянтаў у чаце групы "Карнікі".
Сама Лідзія Коршун адмаўляе датычнасць да абраз у чаце «Карнікі» і аспрэчвае сваю віну ў радыкальных закліках.
Па інфармацыі Генеральнай пракуратуры, адміністратар аднаго з Telegram-канала з мэтай публічнага выказвання сваіх грамадска-палітычных поглядаў і пратэсту, вядзення дэструктыўнай дзейнасці, накіраванай у тым ліку на абвастрэнне напружанасці ў грамадстве, з кастрычніка 2020 года па сакавік 2021 года размясціла паведамленні, якія змяшчаюць заклікі да ўдзелу ў групавых дзеяннях, якія груба парушаюць грамадскі парадак, і аказанні непадпарадкавання законным патрабаванням прадстаўнікоў улады.
Акрамя таго, 3 лістапада 2020 года, выкарыстоўваючы электронную прыладу з доступам у глабальную кампутарную сетку Інтэрнэт, у тым жа мэсэнджары апублікавала паведамленне, якое змяшчае негатыўную ацэнку Старшыні Савета Рэспублікі Нацыянальнага сходу Рэспублікі Беларусь у сувязі з выкананнем ёю службовых абавязкаў. Паказаная абраза ўтрымлівала ненарматыўную форму маўленчага выказвання.
У судовым пасяджэнні абвінавачаная віну прызнала ў поўным аб'ёме.
З улікам меркавання дзяржаўнага абвінаваўцы, характару і ступені грамадскай небяспекі учыненых злачынстваў, змякчальных віну абставінаў, суд прызнаў Коршун вінаватай у інкрымінаваных дзеяннях.
На падставе ч. 1 арт. 342 і арт. 369 Крымінальнага кодэкса Рэспублікі Беларусь ёй прызначана пакаранне ў выглядзе трох гадоў абмежавання волі без накіравання ў выпраўленчую ўстанову адкрытага тыпу.
