Палітвязня Мельнікава за ўдзел у масавых беспарадках асудзілі на пяць год калоніі
Аляксей Мельнікаў.
У судзе Заводскага раёна Мінска 16 сакавіка вынесены прысуд па крымінальнай справе, узбуджанай у дачыненні да жыхара Мінска, палітычнага зняволенага Аляксея Мельнікава.
Яго абвінавачваюць у злачынстве, прадугледжаным часткай 2 артыкула 293 КК РБ Крымінальнага кодэксу - масавыя беспарадкі.
Мельнікаў быў затрыманы 4 снежня ў рамках крымінальнай справы аб масавых беспарадках у Менску.
Працэс вяла суддзя Жанна Хвайніцкая. Дзяржабвінаваўца - Качанава.
Дзесятага жніўня 2020 года Аляксей Мельнікаў выйшаў у горад у раёне універсаму “Рыга” па асабістых справах. Пры гэтым ён хацеў асабіста даведацца, што адбываецца ў краіне і ў Мінску, у прыватнасці. Удзелу ў блакаванні вуліц у той вечар не прымаў. Аднак, па ягоных словах, з'явіліся людзі і пачалі заклікаць рабіць блакаванне вуліц. Мельнікаў паспрабаваў драбіць камяні, але ў яго не атрымлівалася.
Затым, па ягоных сведчаннях, на людзей выйшла сцяна АМАПу.
Тады Мельнікаў зняў маску і прапанаваў ім скласці шчыты, і “вырашыць справу мірным шляхам”.
Сведка Яхновіч Сяргей, кіроўца тралейбуса 92 маршрута распавёў, што 10 жніўня 2020 года была працоўная змена з 15.30. На ўніверсаме “Рыга” было шмат людзей на пешаходным пераходзе, там ён убачыў сярод людзей камяні. Але настрой быў святочны, агрэсіі ён не адчуваў, не бачыў зброі ў руках людзей. Адзін з камянёў трапіў у кіроўцу, адскочыўшы ад сцяны.
Сваю віну Мельнікаў прызнаў часткова.
Сёння суддзя Хвайніцкая вынесла прысуд: пяць год пазбаўлення волі ў калоніі ўзмоцненага рэжыму.
Таксама суд пастанавіў прызнаць права на задавальненне матэрыяльнага зыску.
