Мінск: пачаўся суд над Рыгорам Давыдавым. Вінавацяць у "замахванні", пацярпелых няма
Суд Фрунзенскага раёна пачаў разглядаць крымінальную справу ў дачыненні да 26-гадовага Рыгора Давыдава – былога супрацоўніка МНС, які звольніўся адтуль у 2019 годзе. Яго абвінавачваюць паводле ч.2 арт. 293 Крымінальнага кодэксу.
Суддзя ў працэсе – Юлія Блізнюк. Дзяржаўнае абвінавачанне падтрымлівае пракурор Аліна Касьянчык.
“Замахванні нявызначаным прадметам”
Рыгора Давыдава абвінавачваюць паводле ч.2 арт. 293 Крымінальнага кодэкса. Згодна з фармуліроўкай, ён нібыта здзейсніў не менш трох кідкоў нявызначанымі прадметамі ў бок праезнай часткі і спецыяльнага транспарта дзясятага жніўня недалёк ад ГЦ “Рыга”.
Падчас паседжання былі прагледжаныя відэаматэрыялы справы. На іх асоба, якую немагчыма вызначыць, здзяйсняе, са слоў дзяржабвінаваўцы, “замахванні нявызначаным прадметам”. Накірунак і супрацоўнікі, у бок якіх ажыццяўляўся замах, таксама не выяўленыя: у справе няма пацярпелых.
Дзяржабвінаваўца аглядала відэазапісы, на якіх, з яе словаў, мужчына, падобны да Рыгора Давыдава, здзяйсняе замахі.
Абвінавачаны адмовіўся ад сведчанняў
На судзе Рыгор віну не прызнаў і адмовіўся ад сведчанняў. Падчас следства ён распавядаў, што прыехаў у Мінску пагуляць, быў у раёне “Рыгі”. Але ў масавых беспарадках удзелу не прымаў: бачыў, як людзі будавалі барыкады з металічнага плота, кідалі камяні. Сам Рыгор, па яго сведчаннях, нічога такога не рабіў: сыйшоў, калі толькі міліцыя пачала разганяць людзей.
Пазоў Мінсктранса
Мінсктранс у асобе юрысконсульта ўпэўнены, што дзеяннямі Давыдава рабоце транспарта была ўчыненая шкода ў памеры 21 тысячы 831 рубля 69 капеек. Таксама ён хоча спагнаць з Давыдава дзяржпошліну ў памеры 1 158 рублёў.
Сведкі не бачылі абвінавачанага
Сведкамі ў справе выступаюць некалькі чалавек, якія прысутнічалі на месцы здарэння, але не бачылі абвінавачанага.
Сведка з Мінсктранса не з’явіўся праз хваробу. Сведка Міхаіл Багданаў распавёў, што ў той дзень трапіў у корак каля “Рыгі”, які ўзнік праз металічныя платы. Ён бачыў людзей, якія крычалі лозунгі, трымалі сцягі, але паводзілі яны сябе мірна: ён не бачыў, каб хтосьці кідаў што-небудзь у бок супрацоўнікаў – і наогул не бачыў там міліцыю.
Кіроўца тралейбуса Ігар Юхновіч даў сведчанні яшчэ 18 снежня: з яго словаў, ён бачыў, што невызначаныя асобы кідалі камяні ў бок супрацоўнікаў міліцыі, аднак сцвярджаць, што гэта быў Рыгор Давыдаў, ён не можа.
Прадстаўнік Мінсктранса адзначыў, што ў акце, дзе пазначаная шкода яго арганізацыі, пазначаная шкода па ўсяму гораду, у тым ліку, маршруты, якія абвінавачаны не мог заблакаваць. І паколькі вызначыць, якія менавіта маршруты ён заблакаваў, не з’яўляецца магчымым, нельга падлічыць і шкоду, учыненую менавіта Рыгорам Давыдавым.
Што адбывалася ў спрэчках?
Пракурор Аліна Касьянчык упэўненая, што асоба, падобная на абвінавачанага, удзельнічала ў масавых беспарадках. Яна лічыць, віна цалкам даказаная, і запрасіла пакаранне – чатыры з паловай гады пазбаўлення волі ў калоніі ўзмоцненнага рэжыму.
У сваю чаргу, адвакат заявіў, што нельга сцвярджаць, што асоба на відэа – Давыдаў, бо не было праведзена ніводнай экспертызы – у тым ліку, партрэтнай. Адзіны доказ яго прысутнасці на відэа – змеркаванне органаў папярэдняга следства. Але нават асоба на відэа не выходзіць на праезную частку, як гэта гаворыцца ў абвінавачанні. На рэчдоках няма ніякіх слядоў Давыдава. Злачынства групай асобаў нельга лічыць абаснаваным, бо абвінавачаны не быў ні з кім асабіста знаёмы і ўзгаджаў дзеянні. Таксама не было ўстаноўлена, што Давыдаў мог авалодаць прадметамі, якімі можна ўчыніць пагром, а таксама няма дадзеных пра прадмет, якім на відэа можна было б учыняць замахі.
Адвакат адзначыў, што з пісьмовых матэрыялаў справы не вынікае, што Давыдаў быў падпісаны і выкарыстоўваў інтэрнэт-рэсурсы, якія заклікалі да пэўных дзеянняў, хаця яго віна часткова даказваецца і цытаваннем такіх крыніцаў. Ён звярнуў увагу, што ў справе няма пацярпелых. Адвакат нагадаў, што Давыдаў сем гадоў працаваў ў МНС і коштам свайго жыцця абараняў жыццё і здароўе грамадзян.
Апошняе слова Рыгора Давыдава заслухаюць 24 лютага ў 10.30.
