Смаргонцу прысудзілі год “хатняй хіміі” за здзек над дзяржаўным сцягам Дапоўнена
Дзмітрый Грыневіч.
У судзе Смаргонскага раёна 1 лютага вынесены прысуд мясцоваму жыхару Дзмітрыю Грыневічу. Якога абвінавацілі ў здзеку над дзяржаўным сцягам (арт. 370 КК РБ).
Справу разглядала суддзя Людміла Пятрова, дзяржабвінаваўца – пракурор Андрэй Клышэвіч.
Працэс распачаўся 27 студзеня.
З матэрыялаў следства, агучаных на судзе вядома, што ўначы 28 кастрычніка на даху гімназіі №4 у Смаргоні Грыневіч зняў вывешаны там дзяржаўны сцяг, акуратна склаў, паклаў у кішэню, а замест яго павесіў "бел-чырвона-белае палатно”.
Пад час судовага следства і допыту абвінавачанага пракурор запатрабаваў для Грыневіча адзін год хатняга арышту.
Адвакат настойваў на апраўданні абвінавачанага.
Адметна, што “знявага” дзяржаўнага сцяга выявілася ў тым, што на палотнішчы знайшлі невялічкі, на паўтары сантыметры, надрыў тканіны. Менавіта з-за гэтага следчыя вырашылі, што сцяг зрывалі і таму меў месца здзек.
Цікава, што гэта дзеянне першапачаткова было расцэнена як начное хуліганства ў грамадскім месцы – на даху гімназіі, якое прывяло, як сцвяржаў суд у пастанове аб адміністрацыйным правапарушэнні, да зрыву навучальнага працэсу (вытрымку можна пабачыць на здымку). За гэта суддзей Людмілай Міхневіч накладзены на вінаватага штраф у памеры 81 руб. Таму Дзмітрый Грыневіч спаслаўся ў крымінальным працэсе на тое, што ўжо пакараны за сваё дзеянне. Але суддзя Людміла Пятрова адхіліла гэты аргумент на той падставе, што тады яго дзеянне прывяло да зрыву навучальнага працэсу, а тут справа ідзе, відавочна, аб зневажанні сцяга. На гэтай падставе яна не лічыць прысуд паўторным пакараннем.
1 лютага суддзя Людміла Пятрова вынесла прысуд: адзін год абмежаванне волі без накіравання ва ўстановы адкрытага тыпу (хатняя хімія).
У Мінску судзяць за спалены дзяржаўны сцяг
