Жлобін: па справе Каханоўскага і Гопты праходзіць допыт сведкаў Дапоўнена
Яўген Каханоўскі ў судзе
Разгляд крымінальнай справы жлобінскіх юнакоў Яўгена Каханоўскага і Дзмітрыя Гопты працягваецца 28 студзеня у судзе Жлобінскага раёна.
Абодвух вінавацяць адразу па двух артыкулах Крымінальнага кодэкса: ч. 1 арт. 342 (Арганізацыя або актыўны ўдзел у групавых дзеяннях, якія груба парушаюць грамадскі парадак) і арт. 364 (Гвалт альбо пагроза прымянення гвалту ў дачыненні да супрацоўніка органаў унутраных спраў).
Справу разглядае суддзя Ірына Прадун. Дзяржабвінаваўца – пракурор Аношка.
На ўчорашнім пасяджэнні было праведзенае судовае следства, дапытаныя абвінавачаныя.
Сёння суд апытваў сведак па справе. Практычна ўсе яны засведчылі, што ў дні масавых мітынгаў 9 і 10 жніўня 2020 года Дзмітрыя Гопты сярод мітынгоўцаў яны не бачылі.
Адзін сказаў, што быццам бы бакавым позіркам заўважыў яго ў натоўпе. Ці кідаў ён камяні, яны не бачылі.
У той час пра Яўгена Каханоўскага паведамілі, што той кідаў, як мінімум, два разы камяні.
Адзін сведка ў суд не з’явіўся. Зараз ён знаходзіцца ў псіхіятрычнай клініцы на лекаванні.
Адвакат Каханоўскага С. Красноў сказаў, што калі паспеюць сёння перадаць даведку з клінікі, што сведка неадэкватны, то яго паказанні будуць выключаныя са справы і яго не будуць дапытваць. Калі не будзе даведкі, то
прыйдзецца чакаць, калі хлопец выйдзе з лякарні.
Пасля абеду суд прыступіць да вывучэння матэрыялаў справы.
Суддзя Ірына Прадун зачытвае паказанні апошняга сведкі - Сівянкова, які зараз праходзіць стацыянарную судова-псіхіатрычную экспертызу.
Далей былі агучаныя характарыстыкі, дыягназы - абодва маюць псіхічныя адхіленні, а Гопта і адхіленні ў развіцці, пазнаеміліся са скрынамі фотаздымкаў.
Адвакат Каханоўскага выказаў пратэст суддзі, калі яна пачала чапляцца ў здзеклівай форме да Каханоўскага за тату на ягоным твары. Сказала, чаму ён зрабіў тату на замежнай мове, а не на рускай ці беларускай? І адказала за Яўгена - відаць, таму, што, каб ведаў напісанае, то яму б стала сорамна. Адвакат сказаў, што тату пераводзіцца адным словам "адвалі" і гэта зусім не той змест, пра які кажа суддзя.
Судовае пасяджэнне працягнецца 5 лютага. Пачатак у 10:00.
“Знаходзіліся ў натоўпе, крычалі, шпурлялі ў міліцэйскі транспарт камяні”. Чарговы суд у Жлобіне
