"Чаму вы так абражаеце АМАП?" — працяг суда над Паўлам Спірыным, на які не трапіла каля 70 чалавек Дапоўнена
У Мінскім гарадскім судзе 25 студзеня ў 10.00 пачаўся суд па крымінальнай справе ў дачыненні да Паўла Спірына. Не ўсе жадаючыя змаглі трапіць туды—каля 70 чалавек засталося стаяць па-за заляй судовых паседжанняў, бо ім не хапіла месца. Дзверы залі зачынілі.
- Зала судовых паседжанняў, дзе праходзіць разгдяд крымінальнай справы Паўла Спірына
Блогера Паўла Спірына абвінавачваюць у частцы 1 артыкула 130 КК РБ (Наўмысныя дзеянні, накіраваныя на ўзбуджэнне расавай, нацыянальнай, рэлігійнай альбо іншай сацыяльнай варожасці або варожасці па прыкмеце расавай, нацыянальнай, рэлігійнай, моўнай ці іншай сацыяльнай прыналежнасці).
- Перад пачаткам судовага паседжання над Паўлам Спірыным
Падставай для крымінальных спраў Спірына сталі яго два відэа, якія ён размясціў на сваім youtube-канале: фільм “Грань”, які занесены ў спіс экстрэмісцкіх матэрыялаў, а таксама відэа пад назвай “Жудасная тайна генпракурора Беларусі: карт-бланш на садызм”.
У пачатку судовага пасяджэння Спірын хадайнічаў аб адмове ад адваката. Сваю віну блогер не прызнаў. На судовы працэс яго заставілі пад канвоем. Знаходзіцца ён у клетцы.
Як паведамляе "Радыё Свабода", Спірын таксама заявіў, што не давярае пракурору, і хадайнічаў аб выкліку сведак, якія выказвалі сваё меркаванне пра фільм і былі дапытаныя следствам.
Як паведамляюць naviny.by, у абвінавачванні прагучалі імёны больш за дзесяць чыноўнікаў, у дачыненні да якіх Спірын фармаваў у грамадстве варожасць і нібыта заклікаў да гвалтоўных дзеянняў супраць іх. Паводле версіі абвінавачвання, відэапрадукцыя Спірына фармуе ў грамадстве варожасць у дачыненні да пэўнай сацыяльнай групы, а менавіта дзяржслужачых.
Працэс вядзе суддзя Дзіна Кучук, у якасці дзяржабвінаваўцы выступае Антон Цюменцаў.
- Дзяржабвінаваўца Антон Цюменцаў. Фота: naviny.by
***
Пасля абедзеннага перапынку судовае пасяджэнне над Спірыным працягнулася-жадаючых трапіць на яго было менш.
Свае пытанні дзяржабвінаваўца звязваў з "ацэнкай, якая тычылася дзеянняў супрацоўнікаў міліцыі" — бо яна змяшчалася ў відэа Паўла “Жудасная тайна генпракурора Беларусі: карт-бланш на садызм”:
"Вы ўказваеце, што адны супрацоўнікі рабілі гэта дзеля жылля, а іншыя гэта рабілі дзеля задавальнення сваіх садысцкіх схільнасцей. На чым заснаваныя [такія] высновы?”
На гэта Павел адказаў, што бачыў на сайце Менгарвыканкама чаргу з 400 супрацоўнікаў АМАП, якія маюць патрэбу ў жыллі. Што тычыцца ж садысцкіх схільнасцяў — гэта, на думку Паўла, можна ўбачыць зыходзячы з таго, што адбывалася ў Беларусі 9-11 жніўня 2020 года.
"Што незвычайнага пракуратура тут бачыць? Заўсёды, калі ёсць спрэчкі пра ўладу — заўсёды выяўляюцца не лепшыя чалавечыя якасці", — адзначыў Павел Спірын.
Таксама падсудны падкрэсліў, што ў сваім відэа ён не меў на ўвазе абсалютна ўсіх супрацоўнікаў АМАП, а толькі частку з іх:
“АМАП – гэта як зброя, як аўтамат Калашнікава. Яе можна выкарыстоўваць, напрыклад, для абароны дзяржаўнай мяжы. Але калі аўтаматам можа авалодаць злачынец, то АМАП можа стаць прыладай злачынства [ ... ]".
Акрамя таго, Спірын адзначыў, што ўсё сказанае ім у відэа — гэта яго асабістае меркаванне.
"Падонак з нашыўкай "АМАП" засоўваў у задні праход міліцэйскую дубінку, а ты павінен усміхацца і маўчаць", — працытаваў дзяржабвінаваўца словы з відэа Спірына. — Чаму вы так абражаеце АМАП?”
"Калі супрацоўнік АМАП здольны такое зрабіць — значыць ён падонак. Усё гэта сказана ў кантэксце".
"Што вам вядома па фактах, што [такія дзеянні здзяйсняў] супрацоўнік АМАП або грамадзянін? [...] Ці дадзена ацэнка Следчым камітэтам ці Генеральнай Пракуратурай тым фактам, якія вы выкладаеце?", — спытаў дзяржабвінаваўца.
“Не”.
"Чаму вы тады даеце такую ацэнку, што гэта былі [менавіта] супрацоўнікі АМАП?”
Акрамя таго, дзяржабвінаваўца адзначыў, што відэа Спірына змяшчае крытыку мірных пратэстаў. Спірын адказаў, што гэта звязана з тым, што ўдзел у мірным пратэсце ў Беларусі цягне за сабой адміністрацыйнае пакаранне і, як стала зразумела пазней, крымінальная пераслед.
Павел Спірын таксама адзначыў, што не думаў распальваць ніякай варожасці:
"Мае продкі ваявалі з фашыстамі — і я проста не хачу, каб у нас была грамадзянская вайна".
- Павел Спірын. Фота: naviny.by
Фільм "Грань", прысвечаны антынаркатычнаму заканадаўству ў Беларусі, таксама быў прагледжаны падчас судовага працэсу. Мэту стварэння гэтага фільма Спірын апісаў так:
"Я законапаслухмяны грамадзянін. Я стварыў "Грань" таму, што не хацеў, каб гэтая бяда [наркотыкі — Заўв.] кранула любога дзіцяці ў нашай краіне... Неўзабаве з'явіўся антынаркатычны дэкрэт Лукашэнкі — ён значна абцяжарваў адказнасць за распаўсюд наркотыкаў. Я здзівіўся, але спачатку паверыў у ілюзію: што жорсткая рэакцыя чыноўнікаў на наркотыкі выкліканая тым, што чыноўнікі сапраўды спалохаліся — іх дзеці таксама могуць патрапіць у такую сітуацыю. Аднак гэта было памылкай…"
Спірын апісаў праблемы, якія з'явіліся з узмацненнем жорсткасці антынаркатычнага заканадаўства — непаўналетнія садзяцца на велізарныя тэрміны, у школах не праводзяць дастаткова сур'ёзнай агітацыі і тлумачэнні, як дзеці могуць залучыцца, самі таго не ведаючы, у такую дзейнасць (праз Інтэрнэт-крамы), а ў турмах жа зняволеныя цяжка працуюць, аднак атрымліваюць у якасці зарплаты ўсяго некалькі рублёў у месяц. Павел Спірын меў мэту: "дзеці нарэшце перастануць гніць у турмах і ў іх нарэшце з'явіцца шанец на добрае жыццё". Таксама Павел адзначыў, што згодна з заканадаўствам, ён мае права атрымліваць, распаўсюджваць і захоўваць інфармацыю, а пераслед грамадзян за крытыку караецца пазбаўленнем волі тэрмінам да чатырох гадоў — гэта ён і памятаў пры стварэнні свайго фільма:
"У маім дакументальным фільме няма абразы, гэта проста жорсткая крытыка".
Дзяржабвінаваўцу ж цікавілі многія фармулёўкі, выкарыстаныя Спірын у "Грани", напрыклад:
"Чаму вы зрабілі выснову аб датычнасці супрацоўнікаў МУС і пракуратуры да незаконнага абароту наркатычных сродкаў?"
"Чаму вы лічыце, што ў Шуневіча (міністра МУС на момант выхаду фільма — Заўв.) "ёсць бізнес-імперыя, на якой працуюць непаўналетнія"? [...] Але ж вы валодаеце інфармацыяй, што МУС — гэта дзяржаўны орган, а не прыватнае прадпрыемства?"
Судовы працэс па крымінальнай справе Паўла Спірына будзе працягнуты 26 студзеня.
