Сузаснавальнік BY_Help Аляксей Лявончык – падазроны па крымінальнай справе
Аляксей Лявончык. Фота з сацыяльных сетак.
Сузаснавальнік кампаніі BY_Help Аляксей Лявончык прызнаны падазроным па крымінальнай справе, паведамляе Следчы камітэт.
Згодна з інфармацыяй Следчага камітэту, Аляксей Лявончык учыняў дзеянні, "накіраваныя на дэстабілізацыю грамадскага парадку".
«Усталяваныя факты пералічэння з падкантрольнага яму рахунку у адным з заходніх банкаў грашовых сродкаў для падтрымання пратэстовых акцыяў у Беларусі і аказання матэрыяльнай дапамогі асобам, якія ў іх актыўна удзельнічалі», – гаворыцца ў паведамленні СК.
Менавіта таму на рахункі людзей, якім By_Help дапамагаў у сувязі са збіццём, параненнем, катаваннямі, накладзены арышт.
Аляксей Лявончык пракаментаваў "Белсат" крымінальную справу, распачатую супраць яго.
«Я даведаўся пра гэтую сітуацыю толькі з паведамленняў у СМІ. Аніякіх папераў ад Следчага камітэту не атрымліваў. Хіба таму што жыву за мяжой ужо 12 год, і ўжо не маю беларускага адрасу. Калі хочуць, то няхай высылаюць паперы на польскі або брытанскі адрас», — гаворыць сузаснавальнік кампаніі By_Help.
Ён падкрэслівае, што быў не вельмі здзіўлены распачатаю крымінальнай справаю.
"Калі ў краіне ўжо ёсць 1,5 тысячы справаў, вельмі дзіўна што да мяне дайшлі толькі цяпер. Але я ў добрай кампаніі".
Аляксей запэўнівае, што на працу фонду гэтая сітуацыя аніяк не паўплывае.
«Мы будзем працягваць працу ў стандартным рэжыме. Але зменім спосабы дастаўкі грошаў і выплат».
