Да Шабнам Худайдодавай не пускаюць адваката

2015 2015-07-08T15:40:03+0300 2015-07-08T16:09:08+0300 be http://spring96.org/files/images/sources/shabnam_hudojdodova.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Шабнам Худайдодава

Шабнам Худайдодава

Больш за дзесяць дзён не дапускаюць адваката ў следчы ізалятар горада Брэста да арыштаванай актывісткі «Групы 24» Шабнам Худайдодавай.

Як паведаміла Міжгона Худайдодава, сястра актывісткі з Таджыкістану, адвакат ужо працяглы час не можа патрапіць да арыштаванай. Па гэтай прычыне Шабнам Худайдодава знаходзіцца ў інфармацыйнай ізаляцыі, што прычыняе ёй маральныя пакуты.

Прычына, па якой адваката не дапускаюць ў следчы ізалятар, заключаецца ў тым, што Генеральная пракуратура Беларусі не выдае спецыяльнага дазволу на наведванне падабароннай.

«Раней усе адвакаты для наведвання сваіх падабаронных у СІЗА або ІЧУ атрымлівалі такія дазволы. Але больш за год таму гэта практыка была адменена як незаконная. Чамусьці яна захавалася для наведвання асоб, якія ўтрымліваюцца ў рамках міжнародных канвенцый.

Але праблема нават не ў атрыманні дазволу. Больш сур'ёзная праблема ў тым, што орган, які вядзе працэс, не дае дазвол ці зацягвае з выдачай дазволу на наведванне кліента ў СІЗА, як мы гэта назіраем у выпадку з Шабнам Худайдодавай. Міжнароднымі органамі ўтрыманне пры такіх умовах прыраўноўваецца да катаванняў», - каментуе сітуацыю юрыст-праваабаронца Раман Кісляк.

У сваю чаргу, Асацыяцыя "Правы чалавека ў Цэнтральнай Азіі» - AHRCA выказвае занепакоенасць у сувязі з тым, што Шабнам Худайдодава ў Беларусі не мае доступу да абароны і адрэзаная ад знешняга свету, а такія ўмовы ўтрымання наносяць шкоду яе здароўю і параўнальныя з катаваннямі.

У гэтай сувязі праваабарончая арганізацыя заклікае міжнародных назіральнікаў у галіне правоў чалавека заклікаць Беларусь выконваць абавязальніцтвы ў межах Міжнароднага пакта аб грамадзянскіх і палітычных правах і Канвенцыі ААН супраць катаванняў і іншых жорсткіх, бесчалавечных ці прыніжаючых годнасць відаў абыходжання і пакарання.

Нагадаем, актывістка апазіцыі з Таджыкістана Шабнам Худайдодава была затрымана ў Беларусі 15 чэрвеня і змешчана ў СІЗА г. Брэста. Яе затрымалі па запыце Таджыкістана, паколькі яна абвінавачваецца па артыкуле 37 Крымінальнага кодэкса Таджыкістана - «Адказнасць саўдзельнікаў злачынства». Актывісцы пагражае экстрадыцыя з Беларусі, катаванні і зняволенне на радзіме. Асацыяцыя «Правы чалавека ў Цэнтральнай Азіі» - AHRCA расцэньвае крымінальны пераслед Ш. Худайдодавай палітычна матываваным.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international