Затрыманні ў Беларусі 31 жніўня Дапоўнена
Лілія Уласава
Затрыманні, у тым ліку і сябраў Каардынацыйнай рады, у Беларусі працягваюцца 31 жніўня.
Упраўленне дзяржбяспекі ранкам затрымала сустаршыню стачачнага камітэта "Беларуськалія" Анатоля Бокуна, ён дастаўлены ў Салігорскі РАУС. Пазней стала вядома, што яго асудзілі на 15 сутак арышту.
Каля 15.20 у Мінску была затрымана сябра Каардынацыйнага савета Лілія Уласава. Затрыманне ажыццяўлялі супрацоўнікі Дэпартаменту фінансавых расследванняў Камітэта дзяржкантролю. Пра гэта ў сваім тэлеграме паведаміў іншы сябра Рады Павел Латушка. Таксама вядома, што ў яе доме адбыўся ператрус.
У Гомелі затрымалі сябра Каардынацыйнай рады Васіля Палякова, піша "Радыё Свабода". Васіль Палякоў быў у судзе Цэнтральнага раёну Гомеля, даведваўся пра лёс затрыманых 30 жніўня. Выйшаў з суду і быў затрыманы міліцыяй. Дзе ён цяпер — невядома.
Каля 6 вечара ў Віцебску была затрымана актывістка і блогерка Алена Янушкоўская. Яе павезлі ў РАУС складаць пратакол за удзел у несанкцыянаваным масавым мерапрыемстве (арт. 23.34 КаАП).
У Магілёве прыкладна ў 18.30 каля ГЦ "Атрыум" супрацоўнікі АМАП затрымалі 6 чалавек. Магілёўскім праваабаронцам вядомыя імёны і прозвішчы:
- Герасіменка Валянцін
- Харытон Мікалай
- Хітрыкава Алеся
- Ратнікава Дар'я
- Башарымава Вольга
- Аляксандр Страх
Іх павезлі ў РАУС Ленінскага раёна. Пазней усіх вызвалілі.
Будзе дапаўняцца.
