МЗС Літвы уключыў у "чорны спіс" 118 службовых асобаў, а ЕС не мае намеру спускаць на тармазах парушэнні правоў чалавека ў Беларусі
Міністэрства замежных спраў Літвы прапануе ўвесці Нацыянальныя санкцыі ў дачыненні да службовых асобаў, адказных за фальсіфікацыю выбараў і празмернае прымяненне сілы супраць мірных пратэстоўцаў у Беларусі. Пра гэта пішуць naviny.by.
Дарадца кіраўніка МЗС Літвы Раса Якілайтэне заявіла:
"Міністэрства замежных справаў перадало ў Міністэрства ўнутраных спраў ўдакладнены спіс. Цяпер у ім 118 асобаў, на якіх прапануецца накласці санкцыі".
Асобам, уключаным у чорны спіс, будзе забаронены ўезд у Літву. Канчатковае рашэнне прыме міністр унутраных спраў Рыта Тамашунене.
Падрыхтоўкай санкцыйнага спісу ў дачыненні да беларускіх службовых асобаў займаецца цяпер і Еўрапейскі Саюз. Чакаецца, што гэтае пытанне будзе абмеркавана падчас нефармальнай сустрэчы кіраўнікоў МЗС краін ЕС 27-28 жніўня ў Берліне.
Таксама партал навінаў паведамляе, што кіраўнік нямецкай дыпламатыі асудзіў дзеянні беларускіх уладаў у дачыненні да пратэстоўцаў.
Са слоў міністра замежных спраў ФРГ Хайка Мааса, Еўрасаюз не мае намеру "пакідаць без адказу сур'ёзныя парушэнні правоў чалавека і асноватворных прынцыпаў дэмакратыі".
Мірныя дэманстранты ў Беларусі патрабуюць не больш, але і не менш, чым дыялогу з уласнай уладай, заўважыў Маас.
Ён назваў абсалютна непрымальнымі затрыманні, допыты і запалохванні членаў створанага па ініцыятыве Святланы Тіханоўскай Каардынацыйнага савета для трансферу улады.
