Тром актывістам "Народнай Грамады" прысудзілі праз Skype яшчэ па 15 сутак арышту Дапоўнена
Актывістам "Народнай Грамады" Валянціну Троцкаму, Аляксандру Грэчышнікаву і Вераніке Мішчанка прысудзілі новыя 15 сутак арышту. Суды над імі прайшлі 16 чэрвеня праз Skype-канферэнцыю, бо кожны з актывістаў адбывае ранейшыя 15-суткавыя арышты — за ўдзел у "несанкцыянаваным масавым мерапрыемстве" (арт. 23.34 КаАП). Падстава гэтых арыштаў — знаходжанне актывістаў на пікетах па збору подпісаў за вылучэнне альтэрнатыўных кандыдатаў.
Такая ж падстава была і ў новых адміністрацыйных пратаколах, якія разглядаліся 16 чэрвеня.
Валянціна Троцкага судзілі ў судзе Фрунзенскага раёна. Рашэнне аб новым арышце ў 15 сутак прыняў суддзя Дзмітрый Лукашэвіч.
Валянціна Троцкага затрымалі ранкам 3 чэрвеня, а на наступны дзень асудзілі на 15 сутак. На волю ён мусіў выйсці 18 чэрвеня, але верагодна, з улікам новага пакарання, застанецца пад вартай да 3 ліпеня.
Таксама 16 чэрвеня ў судзе Заводскага раёна горада Мінска суддзя Капцэвіч асудзіла Аляксандра Грачышнікава на 15 сутак адразу па двух пратаколах — за прысутнасць на пікетах 21 і 24 траўня. Судовае паседжанне, якое было запланавана на 16.00, распачалося амаль на дзве гадзіны пазней. Як растлумачыў сакратар суда, перашкодзілі гэтаму нейкія тэхічныя прычыны. Аляксандр выйшаў на сувязь з Цэнтра ізаляцыі правапарушальнікаў, бо на дадзены момант таксама адбывае яшчэ адныя 15 сутак арышту за тое, што прысутнічаў на пікеце па збору подпісаў сёмага чэрвеня.
У той жа дзень асудзілі і Вераніку Мішчанка. Акалічнасці ўсё тыя ж — праз Skype суддзя вынес рашэнне аб новых 15 сутках арышту. Зараз Вераніка таксама адбывае арышт у 15 сутак, які раней вынесла суддзя Таццяна Мотыль за ўдзел актывісткі ў пікетах сёмага чэрвеня.
![]()
За паўтара месяца – больш за 1200 сутак арыштаў і сотня непад'ёмных штрафаў. Наперадзе новыя суды