Дзмітрый Папоў знаходзіцца пад арыштам
Дзмітрый Папоў. Скрыншот з відэазвароту
Як стала вядома Праваабарончаму цэнтру “Вясна”, затрыманы ў Мазыры мадэратар сацсетак "Краіны для жыцця" Дзмітрый Папоў з 5 чэрвеня знаходзіцца ў Цэнтры ізаляцыі правапарушальнікаў на Акрэсціна ў Мінску.
Ён быў арыштаваны судом на 15 сутак. У чым абвінавацілі Дзмітрыя Папова дакладна не вядома.
Таксама ў ЦІП знаходзяцца яшчэ тры жыхара Мазыра: аўтар канала "Мозырь для жизни" Аляксандр Цуканаў і яго сябар Дзяніс Колас, а таксама фермер Аляксандр Вянгура, пра якога здымаў сюжэт блогер Сяргей Ціханоўскі. Кожны з іх атрымаў па 15 сутак адміністрацыйнага арышту.
Затрыманых напярэдадні мазырчукоў паспелі асудзіць?
Нагадаем, мадэратар сацыяльных сетак "Краіны для жыцця", грамадзянін РФ Дзмітрый Папоў знік увечары 4 чэрвеня. Да гэтага ён запісаў відэа, у якім распавядае, што яго шукаюць міліцыянты і хочуць затрымаць яго ў межах нейкай крымінальнай справы. Міліцыя забрала ўсе яго рэчы. Затым Папоў перастаў выходзіць на сувязь.
