Толькі праз тыдзень адвакат патрапіў да арыштаванага Алеся Круткіна

2020 2020-02-06T11:16:18+0300 2020-02-06T11:30:04+0300 be https://spring96.org/files/images/sources/krutkin-ales-1.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Алесь Круткін. Фота са старонкі ў фэйсбуку.

Алесь Круткін. Фота са старонкі ў фэйсбуку.

Актывіст грамадзянскай кампаніі “Еўрапейская Беларусь” Алесь Круткін працягвае адбываць пакаранне ў Полацкім ізалятары часовага ўтрымання.

“Нарэшце даведаліся, як справа ў сына”, – распавяла сайту palitviazni.info маці актывіста.

28 студзеня Алесь Круткін быў асуджаны на 15 сутак Полацкім раённым судом. Яго пакаралі за ўдзел у мірных акцыях у абарону незалежнасці краіны, якія праходзілі ў Мінску ў снежні 2019 году.

Як паведамляла “Еўрапейская Беларусь”, суд над актывістам прайшоў у закрытым рэжыме, інфармацыя пра яго стала вядомая толькі пасля таго, як актывіста даставілі ў Полацкі ізалятар часовага ўтрыманьня.

Дададзім, што ў лістападзе Алесь Круткін таксама патрапіў на 15 сутак за рэпост ў сацыяльных сетках. Суддзя палічыў, што публікацыя ўтрымоўвала «заклік на незаконнае мерапрыемства на Кастрычніцкай плошчы ў Мінску».

“28 студзеня мне патэлефанаваў участковы і паведаміў, што ў Віцебску сына затрымалі, – кажа маці актывіста. – Да гэтага яго вельмі шукалі. За два дні да затрымання дадому прыходзіла міліцыя ў 9 гадзін раніцы, каб мне ўручыць павестку для Алеся. Я не распісвалася, сказала, што сын ужо дарослы і ў стане сам распісацца”.

Алесь Круткін з 28 студзеня знаходзіцца ў Полацкім ізалятары часовага ўтрымання, і працяглы час да яго не мог патрапіць адвакат.

“Спачатку знайшлі полацкага адваката,але жанчына праз нейкі час адмовілася абараняць інтарэсы сына. Быццам з-за таго, што захварэла, хаця не выключана, што і не захацела, каб не займець сабе праблем, – адзначае суразмоўца. – Пасля тэрмінова заключылі дамову з мінскім адвакатамі, і той 4 лютага наведаў Алеся”.

Са слоў адваката, Алесь Круткін знаходзіцца ў камеры на дваіх чалавек і аптымізма не губляе.

“Ад імя Алеся пададзена скарга ў Віцебскі абласны суд, але 3 лютага адваката не пусцілі ў ІЧУ, – дадае маці актывіста. – Сказалі, што, маўляў па панядзелках нельга наведваць. А панядзелак, 3 лютага, якраз і быў апошнім днём падачы скаргі, таму ў суд скаргу адправілі без подпіса. Зрэшты, гэта фармальная працэдура, бо Алесь усё роўна выйдзе раней, чым суд разглядзіць скаргу”.


   Навіны ад Spring96.org у Telegram. Падпішыся на наш канал https://t.me/viasna96 

Апошнія навіны

Партнёрства

Сяброўства